Komîteya Abdullah Ocalanî rê Azadîye ya Îtalya çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de vizêr Zanîngehê Roma de konferansêk serûber kerd.

Beşê yewinî yê bi sernameyê ''Tirkîya de tepişteyanê sîyasîyan û sîstemê zîndanî'' de hêverî Şaredarê Herêma 3. yê Roma Amedeo Caccheriyî moderatorîye kerde û Hetkarê Serekê Koma Keskan Marco Grimaldiyî qisey kerd. Grimaldiyî dîyar kerd ke Îtalya deyndara Abdullah Ocalanî ya û vat: ''Ganî azadîya Ocalanî biba meseleya ma ya verêne. Projeyê ey Konfederalîzmo Demokratîk seba pêro şaran girîng o. Ganî ma ney bipawê.''

Dima Profesora Zanîngehê Roma Enrica Rigoyî qisey kerd û pare kerd ke şert û mercê tecrîdê vera Rayberê Şarê Kurdî Abdullah Ocalanî nênê qebulkerdene. Rigoye vat: ''Ocalan bi paradîgmaya xo teyna şaranê Rojhelatê Mîyanênî rê ney şaranê dinya rê ameyoxêkî pêşkêş keno.''

Vervatoxê Komîteya Abdullah Ocalanî rê Azadîye ya Îtalya û senatorê verênî Giovanni Russo Spenayî vat: ''Tecrîdê vera Ocalanî huqûqî binpay keno. Ewropayîjê ke tecrîd de rol kay kenê, hînî wa bêveng nêmanê. Wextê azadîya Ocalanî ameya.''

Avûkat Arturo Salerniyî vat: ''Abdullah Ocalan 25 serrî yo binê tecrîdî de tepişîyeno û ma zî nê tecrîdî ra mesuldar ê. Ganî pêro rêxistinê mîyanneteweyî nê tecrîdî sey bêhuqûqîye pênase bikerê la bêveng ê.''

Avûkatê Abdullah Ocalanî Ozgur Erolî vat: ''Zîndanê Îmraliyî mîyanê sînorê welatêkê endamê Konseya Ewropa de yo. La Ocalan 13 serrî yo nêeşkeno avûkatanê xo bivîno. Meseleya kurdan û sîstemê Îmraliyî yê dewlete girêdaye yê.  Ewro ganî ma seba azadîya Ocalanî biqîrê. Seba ke meseleya kurdan çareser biba Ocalan eşkeno rolêkê tewr pîlî kay bikero. Coka ganî o azad bibo.''

Wekîla HEDEPî Newroze Uysal vat: ''Qedexe û binpaykerdişî teyna Îmrali de ney her ca de vera kurdan est ê. Ocalanî tim seba haştîye veng da la vengdayîşê ey hetê dewlete ra bêcewab ameyî verdayene.''

Avûkate Maura Palma vat: ''Ganî Ewrop têkilîyanê xo yê bi Tirkîya newe ra biercna. Ewropa hemkar û muxataba meseleya Îmraliyî ya. Ganî Ewropa tedaya Tirkîya bikera ke wa Ocalan bieşko keye û avûkatanê xo bivîna.''

Beşê diyînî yê konferansî de karîkaturîst Zerocalcareyî qisey kerd û vat: ''Paradîgmaya Ocalanî ewro Şingal û Rojawan de yena caardene. Tirkîya seba ke paradîgmaya Ocalanî ra tersena ey tecrîd kena.''

Dima Serekê Konseya Keskan a Herêma Lazioyî Claudio Marottayî qisey kerd û bale ante fikranê Ocalanî ser.

Endama Têgêrayîşê Cinîyan ê Kurdan Zîlane Dîyar ard ziwan ke çira cinîyan ê kurdan azadîya Abdullah Ocalanî de israr kerdo.