Konferansê Ciwanan ê Dinya de yo ke hetê torra 'Ciwanî Tarîxî Nusenê' ra paytextê Fransa Paris de yeno kerdene, problemê têgêrayîşanê ciwanan ê dinya ameyî nîqaşkerdene.Konferansê ke vîzêr dest pêkerd û do hîrê rojî dewam bikero. 

Florian Andréyî ke qiseykerdişê akerdişî kerd, vat ê nê konferansî dîyarîya Rayberê Şarê Kurdî Abdullah Ocalanî kenê. 

Badê qiseykerdişê akerdişî vîdeoyo ke qala kapîtalîzm û têkoşînê ciwanan keno ame seyrkerdene û cayanê cîya cîyayan ê dinya ra mesajê ke şawîyayî konferans ameyî teqdîmkerdene. Mesajê ke Lublan, Afrîkaya Başûre, Rojawan û Herêmanê pawitişî yê Medya ra ameyî şawitene de vera kapîtalîzmî semedê têkoşînê hemparî yê ciwanan ame vengdayene.

Roja verên a konferansî de bi nameye “Tîtikê krîzî de famkerdişê dinyaya roja ma” panel ame kerdene. Panel de Asya, Amerîkaya Latîne, Rojhelatê Mîyanênî, Ewropa û Afrîka ra temsîlkaranê rêxistinanê ciwanan qisey kerd.

Panelo ke moderaorîya ci Têgêrayîşê Cinîyan ê Ciwanan ra Zîlane Ateş kerd, bi nameyê Poder Pupular Sofia Sariano, bi nameye Ciwananê Vakurê Kurdîstanî Erdal Şahîn, bi nameye Têgêrayîşê Ciwanan ê Anakbayanî ê Filipinî Rachelle Villamor, rojawanê Afrikara  bi nameye Union des Luttesî Amidou Diamoutene û bi nameye Timî qisey kerd. 

Erdal Şahinî qiseykeridşê xo de vist vîrî ke prosesê zehmetî ra ravîyarenê û nê vatî: “Her ca de faşizm eynî yo. Coka her cayê dinya de û Vakurê Kurdîstanî de vera faşîzmî têkoşîno xurt est o.  Ma nê konferansî de qala rêxistinkerdişê ruhê nê têkoşînî kenê. Ma wazenê vera problemanê ke ciwîyenê têkoşînê îdeolojîkî bikerê. Meseleya kurdan hinda bîya meseleya dinya. Meseleyê kurdan bîyî meseleye şaranê dinya.  Çunke hêzê hegemonîkî nêwazenê meseleya kurdan bêro çareserkerdene. Ewro kurdî her her ca de têkoşîn kenê. Eke meseleya kurdan bêra çaresekerdene, Rojhelatê Mîyanênî de şer qedîyeno. Coka ma sey ciwanan wazenê hemleya “Abdullah Ocalanî rê azadîye, meseleya kurdan rê çareserîya sîyasîye” ya ke 9ê teşrîna verêne de dîyaye destpêkerdene, heta peynî rayra berê. Dinya de çîyo verên o ke şaredar û wekîlî bi hewayêkê komkî yenê tepiştene, erzîyenê zîndanan. Ma temsîlkaranê xo vîjnenê dewleta tirke înan tepişena. Hem Kurdîstan de hem zî her cayanê bînan ê dinya de ganî vera faşîzmî têkoşîn bêro xurtkerdene.” 

Qiseykerdoxanê bînan zî vîzt vîrî ke sîstemê kapîtalîstî ciwanan de bêhêvîye afirnenî û vera faşîzmî bale ante muhîmîya têkoşînê hemparî yê ciwanan û xoverdayîşî ser.