Koordînasyonê Komalanê Ciwanan bi eşkerayîyêke da zanayene ke înan bi şîarê ''Pê ruhê Apogîrî ma xo newe bikerê, şerê azadîye ser bivisnê'' Konferansê Ciwanan ê PKKyî yo 1. kerd.

Eşkerayîye de ame parekerdene ke konferans dîyarîya şehîdê Zapî Rizgar Karasungurî ame kerdene.

Eşkerayîye de dîya zanayene ke 40 delegeyî tewrê konferansî bîyê û konferansî 9 rojan bi nîqaş, ercnayîş û agahdarkerdişan dewam kerd. Eşkerayîye de wina ame vatene: 

''Konferansê ma bi rojdemê taybetî asta têkoşînê têgêrayîşê ciwanan, raştîya xeta Apogîre û caardişê na xete ercnayî û resa netîceyanê girîngan. Ganî ma sey ciwananê Apogîran her hetî ra Rayberîye biercnê û bimusê. Rayber Apo rayberê çareserîya meseleyanê ma yo. Rayber Apoyî Îmrali de vera hêrişan paradîgmaya xo viste dewre û dişmen mat kerd. Konferansê ma nêzdbîyayîşê xayîn, qels û xeletî yê bi raştîya Rayber Apoyî zî ercnayî û nê şermezar kerdî. Goreyê ma 'merkezê şerî Îmrali yo.' Ewro Rayber Apo binê tecrîdêkê giranî de yo. Mesuldar û erkê ma yo tewr pîl caardişê azadîya Rayber Apoyî û rijnayîşê sîstemê Îmraliyî yo. Seba ney ganî ma pêro hêzê xo seferber bikerê.

Modernîteya kapîtalîzme dişmena pêro merdimatîye û kurdan a. Reyna kapîtalîzm verê azadîya kurdan de astengîya tewr pîl a. Modernîteya kapîtalîste tewr zaf hêrişê ciwanan kena, pê dîjîtalîzm û teknolojî kena ke ciwanan yoz bikera. Kapîtalîzm bi rayîrê lîberalîzm û cuya lîberale xo ferz keno. Vera kapîtalîzm û lîberalîzm ganî cuya komunale her ca de bêra awankerdene, desteko komelkî, hûrmetê bi merdimatîye, xebatê hemparî û embazîya raştikêne bêrê averberdene.

Konferansê ma azadîya cinîyan û cinîya azade ser de zî vindert û ercna ke senî ma eşkenê biresê cinî û camêrdanê azadan. Seba ney ganî ma vera polîtîkayanê gemarinan û hêrişanê dişmenî cewab bidê. Îqtîdarê AKP-MHPyî ciwanan rê ajanîye ferz keno. Ganî ma vera nê faşîzmî têkoşînî newe ra înşa bikerê, bi nê hawayî polîtîkayanê şerê taybetî pûç bikerê, xopawitişê xozayîyî bimojnê û serkêşîya şarê xo û têkoşînî bikerê.

Dewleta tirke bi destekê PDK û cerganê xo hêrişê Mexmûr, Şingal, Rojava, Başûr û Vakurê Kurdîstanî kena. Vera ney ganî ma Şerê Şarî yê Şorişgêrî pîl bikerê. Ganî ciwanê Başûrê Kurdîstanî vera îxanetê PDKyî verê xo bidê koyan û bibê gerîla. Rojhelatê Kurdîstanî de ganî ciwanî cuya xo goreyê fikr û felsefeya Rayber Apoyî raşt bikerê û xo rêxistin bikerê.

Konferansê ma de nê ercnayîşan û nîqaşan ser o nê birî ameyî girewtene:

-Seba ke tecrîdî bişiknê û Rayber Apoyî azad bikerê ma do her ca de û her wext seferber bibê.

-Felsefe, fikr û paradîgmaya Rayber Apoyî ma do pêro dinya ra vila bikerê, bidê şinasnayene û seba ney zî têgêrayîşanê ciwanan de îtîfaqê têkoşînî awan bikerê.

-Têgêrayîşê Ciwanan o Apogîr wa cade heqê rewşa kaosî ra bêro, hemleyanê stratejîk û leşkerîyan bikero.

-Ganî feraset, terz û fikr de newebîyayîş bêro kerdene.

-Bingeyê Şerê Şarî yê Şorişgêrî de ma bi şîarê 'keye, tax û welatê xo bipawê' xo rêxistin û amade bikerê.

-Seba xebatanê zanîngehan seferber bibê.

-Xebatê propaganda û ajîtasyonî wa newe ra bêrê înşakerdene, bihêzkerdene.

-Wa ciwanî awanîya neteweya demokratîke, komun, meclîs, akademî û kooperatîfan de serkêşîye bikerê.

-Vera faşîzmî çalakîyê cewabdayîşî wa bi ruhê hemlegîrî newe ra bêrê averberdene.

Herçiqas konferansê ma reya verêne ameyo kerdene zî tradîsyonê ma yê têgêrayîşê ciwanan 50 serre yo. Konferansê ma mojna ke PKK pîk o û vera beno pîlêr. Rixmê pêro hêrişan, tecrîd, destekê xayînan û destekê emperyalîstan zî dişmen nêeşka PKKyî çin bikero. Çunke têgêrayîşê Apogîran têgêrayîşê fedakarîye yo û seba pêro merdimatîye têkoşîn keno. Coka ewro ma her wextî ra zafêr bihêz ê. 

Ma pê bawer ê ke konferansê ma newebîyayîş û vurîyayîş dayê destpêkerdene. Ma sey ciwananê Apogîran tim qerardar, bitecrube û amadekar ê. Ma do peynî de qetî ser bikewê. Ma do sozê xo verê Rayber Apo, şehîdan û şarê ma de bîyarê ca û serfîrazîye bîyarê. Nê esasî ser o ma pêro ciwanan, welatperweran û heskerdoxanê azadîye rê serkewtiş wazenê. Ma venga nînan danê ke bi şîarê 'Pê ruhê Apogîrî ma xo newe bikerê, şerê azadîye ser bivisnê' tewrê nê prosesî bibê.''