Konferansê Kurdan ke Parlamentoya Ewropa de roja Çarşeme dest pêkerd vizêr bi panelê pancin qedîya. Panelan de meseleyê kurdî û çareserîya ci, krîzê Rojakewtena mîyanêne û rolê hêzanê herêmî û mîyanneteweyîye, rewş û perspektîvê Ocalanî, modelê Rojawanî, Konfederalîzmo Demokratîk û mucadeleyê cinîyan ê kurdan gerîyayî dest. Panelê peyênî bi sereyê ‘Rojakewtena mîyanêne de hêzê aşitîye: Cinîyî‘ ame viraştene.
Hemsereka Meclîsê Demokratîkî yê Vakurê Sûrîye Îlham Ahmede bi Skype tewrê panelî bîyî. Ahmede bale ante muhîmîya rolê cinîyan ser û va: ‘‘Sûrîye de rayberîya cinîyan de rêngê çareserî vejîya meydan. Efrîn de qirkerdişêk ame kerdene û sere de cinîyî sivîlan ser o zext yeno kerdene. Ganî Konseya Asayîşî yê Yewîya Mîletan ya ke semedê Îdlîbî ameyebî pêser semedê Efrînî zî tê bigêro.‘‘
Unîversîteya Endemî yê Almanya ra Mechthild Exo zî vist vîrî ke cinîyan ê Federesyonê Surîye ra kesêk tewrê dîyayîşanê Astana û Cenevre nêbîyî û va: ‘‘Aşîtîya mendeye tena bi destê cinîyan yena.‘‘
Unîversîteya Gandî yê Belçîka ra Marlene Schaferse zî bale ante qedexeyê dewleta tirkî yê ziwanê kurdî ser û va: ‘‘Dewleta tirkî tim wazena vengê kurdan bibirno la kurdî bi xoverdayîşî hêzê vengan vejenê meydan.‘‘
Parlamentera Ewropa Eleonora Forenza zî xoverdayîşê cinîyan ê kurdan vist vîrî û va: ‘‘Ganî cinîyê kurdan sey referansî bêrî girewtene. Ez sey femînîstêka Ewropa vana ke ma ganî cinîyan ê kurdan ra zaf ders bigêrê. Sîstemê hemserekîye ke hetê Ocalanî ra ame peşnîyazkerdene Ewropa de çîn o.‘‘
Têgêrayîşê Cinîyan ê Kurdan ê Ewropa ra Done Guzele zî projeyê Konfederalîzmê Demokratîkî yê Ocalanî ser o qisey kerd.