Komeleya Huqûqnasanê Seba Azadîye (OHD) Otêla Elit Worldî ya Taksîmê Îstanbulî de bi sernameyê "Vera sîyasetê tecrîdî têkoşînê haştîye û azadîye" konferansêk orgazîne kerd. Xeylêk huqûqnas, sîyasetmedar û pawitoxê heqan tewrê konferansî bîyî.

Hemserekê Pêroyî yê OHDyî Ekîn Yeterî bi selamkerdişê xoverdayoxanê zînanan ê ke grevê vêşanîye de yê û çalakwananê Nobeta Edaletî dest bi qiseykerdişê xo kerd. Yeterî tecrîdê Îmraliyî sey îşkenceyî name kerd û vat, ''Çarçewaya rejîmê tecrîdî yê Îmraliyî de heqîqatê şarêkî binê tecrîdî de yo.''

Hemvervatoxa DEM Partî Ayşegule Dogan zî vist vîrî ke Abdullah Ocalan xeylêk rey adirbirnayîş îlan kerd û vat, ''Birêz Ocalan semedê haştîye tim destê xo derg keno la dewlete semedê haştîye game nêerzena.'' Dogane mektûbê Abdullah Ocalanî yê Newroza 2013yî zî wend û vat, ''Ma do vengê xo bizêdnê û nê tecrîdî miheqêq wedarê.''

Serekê Weqfê Haştîye Hakan Tahmaz zî vat, ''Eke yew meseleya yena çareserkerdene ganî, çareserîye mabênê temsîlkaranê wird hetan de bibo. Kurdî Abdullah Ocalanî sey muxatabî ramojnenê.  Eke şima wazenê meseleya kurdan çareser bikerê, adresê nê Îmrali yo.''

Badê qiseykerdişanê akerdişî roniştişê verênî bi moderatorîya Avûkat Sezgin Uçarî de dest pêkerd.

Avûkate Urko Alrtza Azurtza seba ke avûkata têgêrayîşê sîyasîyî yê BASKî ya keyfweşîya xo ard ziwan û qala tecrubayanê  înan kerd û vat ê paştî danê têkoşînê azadîye yê kurdan.

Avûkatê Abdulah Ocalanî Faik Ozgur Erol zî bi sernameyê ''Sîstemê Îmraliyî'' qala tecrîdî kerd. Erolî vat Îmrali de qanûn çîn o, halo îstîsnayî est o û  veng da ciwananê kurdan ke wa tesîrê Ocalanî ramojnê.

Avûktê Mandelayî Kisten Govenderî zî bale ante ser ke Mandela û Rayberê Şarê Kurdî Abdullah Ocalan zaf hetan ra secîye yê û vat, ''Tarîx tim nê ramojneno ke hukmat û rejîmê ke vera waştişanê heqdaran ê şaran zext kenê, tim rijîyenê.''

Roniştişê diyînî bi moderatorîya Sekretera Şubeyê ÎHDyî ya Îstanbulî Avûkate Oya Ersoy ame kerdene.Verî mesajê sîyasetmedare  Ayla Akat Ata ya ke Zîndanê Sîncanî de yena tepiştene, ame wendene.

Dima ra avûkatanê OHDyî ra Şevîne Kaya qisey kerd. Kaya vist vîrî ke heme qanûnê zereyî û mîyanneteweyîyî yenê binpaykerdene û vat, ''Îmrali de yew huqûq ame afirnayene la bi ûca sînordar nêmend bi vila. Îqtîdar huqûqî sey çuyeyî şuxulneno. Waşitişê wedaritişê tecrîdê serê Birêz Ocalan huqûqî û meşrû yo.''

Serekê Baroyê Amedî Nahit Erenî zî bale ante hêriş û qirkerdişanê vera kurdan ser ke her wext û hetê her îqtarî ra yenê kerdene û vat, ''Eke tecrîdê Îmraliyî mero wedaritene qet cayêk verê bêhuqûqîye nîno girewtene.''

Rojnameger Ali Duran Tpuzî zî derheqê krîzê hukmî de qisey kerd û vat çîyê ke warê hukmî de yenê kerdene sey kayê tîyatroyî yê.

Modertorîya beşa peyêne ya konferasnî hetê Hemsereka Pêroyî ya ÎHDyî Erene Keskîn ra ame kerdene.

Hemsereka Pêroyî ya DBPyî Çîgdeme Kiliçgun Uçar tecrîd sey problemê esasî name kerd û vat, ''Ma bi mektûbê Birêz Ocalanî dî ke îradeyê haştîye Kurdîstanî ra vejîyayo. No yew proses bi ke heme bawerî û şarî tede bê. Birêz Ocalan vano ke çareserkerdişê meseleya kurdan verê krîzan geno. Wayîrê projeyê haştîye Birêz Ocalan o. Şarê kurdî zî rixmê qirkerdişan haştîye wazeno.''

Huqûqnasi îtalyan Gianni Tagnoniyî zî ard ziwan ke qirkerdişê vera merdimîye yenê înkarkerdene û vat, ''Erdogan paştî dano Fîlîstîn la vera Rojawanî şer keno.''

Hemserekê Hemserekanê DEM Partî Tayîp Temelî zî bale ante polîtîkayanê tecrîd, înkar û şerî ser û vat, ''Heta ke tecrîd dewam bikero no sîyaset zî do dewam bikero. Seba ke hêzanê demokrasîyî yê Tirkîya semedê haştîye têkoşîno hêzdar nêkerd rewşe wina giran a.''