Endamê Komîteya Ciwanan a PKKyî Fîraz Garzanî ANFyî rê qala Konferansê Ciwanan ê Dinya yê Parisî  kerde.

Qiseykerdişê Fîraz Garzanî bi kilmî wina yo:

''Ma Konferansê Ciwanan ê Dinya nameyê têkoşînê azadîye yê merdimatîye ser o girîng vînenê. Konferans de 49 welatan ra, 95 rêxistinan ra 400 ciwanî ameyî têhet. Ciwanan konferans de meseleyî nîqaş kerdî, pêşnîyazê çareserîye pêşkêş kerdî.

Konferans dîyarîya Rayber Apoyî ame kerdene. 3 rojan ra dima beşdarê konferansî tewrê Hemleya 'Abdullah Ocalanî rê Azadîye' bîyî. Teyna nê çîyî eşkera kenê ke ciwanî çend girîngîye danê Rayber Apoyî û azadîya ey. Xora netîcenameyê konferansî de bi zelalî ame vatene ke ciwanî do seba azadîya Rayberîye têkoşîn bikerê. Hetê bînî ra nê konferansî mojna ke ciwanî çendek eleqe mojnenê felsefe û îdeolojîya Rayber Apoyî.

Her çiqas ma nêeşkayî tewrê konferansî bibê zî, erkê ma yo ke ma qerar û armancanê nê konferansî bîyarê ca. Ma pê bawer ê ke caardişê qerar û armancanê Konferansê Ciwanan ê Dinya yê 1. erkê pêro ciwanan o.

Konferans de derheqê rewşa dinya, têkoşînê cinîyan û ciwanan û konfederalîzmê demokratîkî de panelê girîngî ameyî kerdene. Ciwanan tecrubeyê xo yewbînan de pare keerdî. Seba ke waranê cîyayan ra ciwanî beşdarê konferansî bîyê xora fikrê cîyayî zî vejîyayî werte. La nê fikrê cîyayî zengînîye û tecrubeyan do bidê ciwanan. A raşte nê cîyatîyî do yewîya ciwanan zî bîyarê ca.

Konferans de ancî serkêşîya cinîyan ê ciwanan dîyar bîye. Cinîyê ciwanî pêro xebatanê konferansî de zaf aktîf bîyî. Embazê ma yê cinîyî pawitoxê cuya azade yê. Ma pê bawer ê ke embazê cinîyî asta mîyanneteweyîye de bi rêxistinîya xo tesîrê pêro dinya bikerê.

Seke zanîyeno konferans bi vengdayîşê 'Bibê yew, pîya dinya bivurnê' qedîya. Ma zî tewrê nê vengdayîşî benê. Ganî ma hînî seba ney bixebitê û têkoşîn bikerê.''