Platforma li diji Dagirkeriye (Platformê vera îşxalî) yo ke Ewropa de ame ronayene  ewro Hollanda de konferansêk kerd.

Çar leteyan ra temsîlkarê partîyanê kurdan û roşnvîrî konferansê tewrê konferansê bîyî. Reyna wekîlê HDPyî û hemşaredarê ke surgun de yê înan zî konferans de cayê xo girewt.

Refîk Gegurî ke bi nameyê platformî qisey kerd vat platform qet yew partîye û dezgehî rê girêdaye nîyo û peyê platformî de 1200 îmzakerî estê. Gegurî vat: ''Waştişê ma oyo ke ma partîyanê kurdan bîyarê têhet ke wa vera îşxalî têkoşîno hamper bêro kerdene. Ewro estbîyayîş û çînbîyayîşê ma têkoşînî rê girêdaye yo. Coka ganî her kes hîsgêr bo.''

Rojameger Fehîm Işikî zî bi nameyê dîwanî qisey kerd û vat amancê nê platformî vera îşxalê ronayîşê yewîya kurdan o.

Partîya Welatperweran a Kurdîstanî (YNK) yî ra Şêx Şemal zî vat: '' Ganî her kes vera hêrişê îşxalî yê vera Kurdîstanî vejîyo. No şerê estbîyayîş û çînbîyayîş o.''

Asya Abdulaha ke bi nameyê KONGRA-STARî qisey kerd ard ziwan ke kurdî prosesê krîtîkî ra ravêrenê û vat: ''Ewro vera îşxalkeran têkoşîno xurt yeno dayene.  Her roje ma bi desan şehîdan danê. Ganî ma wayîrê nê ercanê vejîyê. Coka ewro êyê ke Kurdîstan de vera îşxalî nêvejîyenê ganî vera înan tewir bêro girewtene. Çîyo winayên nîno qebulkerdene.  Kurdîstan de adre û nameyê îşxlakeran zelal o. Ganî vera nayî tewirê ma pêrune eşkera bo.  Ma nika tîya qisey kenê la komelê ma dejê nê anceno.  Ma şehîdan danê, mirenê, yenê surgunkerdene û erzîyenê zîndanna.  Ma mecburê ke vera îşxalkeran têkoşîn bikerê.''

Hemserekê KNKyî Ahmet Karamusî zî wina qisey kerd: ''Yewîya neteweyîye têna pê xebata akademîsyen û roşnvîran eşkena bêro. Ganî mabênê heme partîyan de dîyalog berê ronayene ke têkoşîno hempar ê vera dişmenî bêro pîlkerdene.''

Endamê Konseya Rayberdişî ya KCKyî Zubeyîr Aydar bi nameyê şerwanê ke sefanê verênan ê cepheyî de şer kenê platform selam kerd û vat: ''Ma nê xebatî zaf muhîm vînenê û paştî danê ci. Ganî kurdî bibê yew û Dêrismî ra heta Qers, Efrînî ra heta Şingal Kerkukî têkoşîno hempar bêro pîlkerdene.''