Dîwanê Hemserekîye yê KONGRA-GELî venga pêro kurdîstanijan û dostanê înan da ke seba çareserîya meseleya kurdan û caardişê azadîya Abdullah Ocalanî 17ê sibate de sey laserî biherikê rayraşîyayîşê merkezî yê Kolnî.
Dîwanê Hemserekîye yê KONGRA-GELî derheqê rayraşîyayîşê merkezî yê Kolnî de eşkerayîyêka nuştekîye daye.
KONGRA-GELî da zanayene ke Rayberê Şarê Kurdî Abdullah Ocalanî kurdî verê qirkerdişî ra xelisnayê û o bîyo hêvîya şarê kurdî. KONGRA GELî îfade kerd ke seba ney zî vera Abdullah Ocalanî Komployo Mîyanneteweyî ameyo caardene.
KONGRA-GELî eşkerayîya xo de wina vat: ''Rayber Apo 25 serrî yo Îmrali de pêro heqanê xo ra bêpare yeno verdayene û hîrê serrî yo tira qet xeberêke zî nêna girewtene. Verê na rewşe de dezgeh û rêxistinê mîyanneteweyîyî zî bêveng ê. Sîstemê qirkerdişî yê Îmraliyî netîceya sîstemê qirkerdişî yê vera kurdan o. Destekê welatanê Ewropa ra nêbîyêne dewleta tirke nêeşkayêne nê polîtîkayanê înkar û îmha bîyara ca.
Dewleta tirke mîyanê nê serran de bi planê çinkerdişê têgêrayîşê kurdan sereyê xo vist mîyanê prosesê çinbîyayîşî. Binkewtişê dewleta tirke yê vera gerîlayan û krîzê ci mojnenê ke hînî wextê ci ameyo ke sîstemê Îmraliyî bêro rijnayene.
Sey beşdaranê têgêrayîşê azadîye yê Kurdîstanî merkezê armancanê ma caardişê azadîya Rayber Apoyî yo. Seba ke ma sîstemê Îmraliyî birijnê û azadîya Rayber Apoyî bîyarê ca ganî Ewropa de têkoşînê xo aver berê.
Coka rayraşîyayîşo merkezî yo ke 17ê sibate de Koln de bi şîarê 'Abdullah Ocalanî rê Azadîye, Meseleya Kurdan rê Çareserîya Sîyasîye' do bêro kerdene, zaf girîng o.
Ma venga pêro şarê xo yê Ewropa û dostanê xo danê ke bi ruhê seferberî 17ê sibate de Koln de ma bêrê yewca. Şar û dostê ma 17ê sibate de sey laserî biherikê rayraşîyayîşê merkezî yê Kolnî û tarîxî binusê.''
