Kongreya Pîle ya 5. ya HDPyî Anqara de bi şîarê 'Çareserîye ma de ya'  pê beşdarîya bi des hezaran kesan û bi coşî dest pêkerd. Şaristananê Vakurê Kurdîstanî ra û şaristananê Tirkîya ra xeylêk kesî seba kongre Salona Sporî ya Arena de ameyî yewcaç 

Salone de pankarta bi nuşteyê 'Denîze Poyraz bêmerg a' reyde posterêko pîl ê Poyraze ame daliqnayene. Kongre de pankartê sey 'Pê Îtîfaqê Demokrasî Rayîro Hîrêyîn', 'Vera şîdetê serê cinîyan, çareserî ma yê', 'Şer û tecrîd nê haştîye û çareserîye', 'meseleya kurdan de çareserîya demokratîke' bale ancenê.

Kongre de do 1050 delegeyî raye bidê û Meclîsê Partîye (PM) û hemserekî bêrê weçînayene. Sîyasetmedarê kurdî û wekîlê verênî Ahmet Turk, Adem Geverî, Abdullah Zeydan, Behçet Yildirim û Sirri Sureyya Onder zî tede xeylêk sîyasetmedarî, temsîlkarê rêxistinanê komelê sivîlî, dezgehanê cinîyan, merdimê tepişteyan, Keyeyê Şenyaşarî zî tewrê kongre bîyî.

Kongre de HDK, KCD, DBP, ESP, EMEP, DHP, TÎP, TOP, BDSP, TSÎP, DSÎP, SODAP Û SYKP ameyî temsîlkerdene. Temsîlkaranê partîyanê Îtîfaqê Kurdîstanî KDP-T, KKP, PAK, Têgêrayîşê Azadîye, Komeleya Kurdan a Demokratîke ya Şoreşgere, PSK, HAK-PAR û Partîya Azadîye zî kongre de amade yê.

Partîyanê Meclîsî ra zî Hetkarê Serekê Pêroyî yê CHPyî, Sekretero Pêroyî yê Gelecek Partî Kanî Torun, Hetkarê Serekê Gelecek Partî Musata Bîlîcî, Sereka Polîtîkayanê Cinîyan a Partîya Demokrasî û Hemle (DEVA) Elîde Esen û Hetkarê heman partîye Mehmet Emîn Ekmen, Hetkarê Serekê Partîya Saadetî Fatîh Aydin, Serekê Yewina Koordînasyonê Astengdaran a Yenîden Refah Partî Davut Konakçi û Wekîlê Serekê Tek Partî Suleyman Yagcioglu zî heyetî reyde beşdarê kongre bîyî.

Sere de Ewropa xeylêk partîyê dinya zî tewrê kongre bîyî.

Başûrê Kurdîstanî ra Hizbî Zehmetkêşan, Hizbî Şûî ya Kurdistanê, Bizûtneweyê Rizgari Demokratî Kurdistan, Yekitiya Parlamenterên Kurdistanê, Yekitiya Neteweyî Demokrat a Kurdistanê kongre de amade yê.

Hemserekê Pêroyî yê HDPyî Pervîne Buldan û Mîthat Sancar bi çepik û tîlîlîyan hetê bi des hezaran kesan ra ameyî pêşwazîkerdene.

Seba Dîwanê Kongre Hetkarê Serekwekîlê Koma HDPyî Saruhan Oluç, wekîlî Dîlane Dîrayet Taşdemîr, Dersime Dag, Serpîle Kemalbay û Necdet Îpekyuz ameyî weçînayene.

Kongre bi qiseykerdişê Pevîne Buldan  dest pêkerde.