Îran û Iraq de vîrusê Korona bi hawayêkê lezî vila bena.  Îran de hûmara merdimanê ke Korona ra merdî resaye 92 kesî. Iraq de zî reyna kesêk Korona ra merd.

Îran

Îran de mergê vîrusê Korona dewam kenê. Goreyê zanayîşanê selahîyetdaranê Wezaretê Weşîye yê Îranî vizêr şan Îran de hûmara merdimanê ke vîrusê Korona ra merdî resaye 92 kesî. Îran de 2922 kesî zî vîrusî ra kewtî. Serekê Îrtîbatî yê Wezaretê Weşîye yê Îranî Kîyanuş Cîhanpurî şan Tehran de kombîyayîşêk de pare kerd ke 24 saetanê peyênan de 15 kesî vîrusî ra merdî. 

31 eyaletanê Îranî de vîrus ame tesbîtkerdene. Wezîrê Bazirganî, Madenî yê Îranî Riza Rahmanî, Wezîrê Weşîye  Îraj Harîrcî, Vervatoxê Hikmatî Alî Rebîî, Şêwirmenda Serekkomar Masûme Îbtîkar û zaf parlamenterî vîrusî ra kewtî. Îran de dibistanî, dezgehê fermîyî û parlamentoyî semedê vîrusê Korona ra girewte yê. Bire ameye dayene ke Îran de wextêk sey tebdîrî nimajê îneyî zî do nêro kerdene.

Iraq

Vervatoxê Wezaretê Weşîye yê Iraqî Seyf El Bedrî ard ziwan ke Iraq de reya verêne cinîyêke Bexdad de vîrusî ra merde. Ame vatene ke şaristananê Diyala û Necef de zî 3 kesanê bînan de vîrus ame tesbîtkerdene û hûmara nêweşanê Korona bîye 35 kesî. Başûrê Kurdîstanî de zî vizêr malayê Camîyê Mehwî yê Silêmanî Mele Reşîd vîrusê Korona ra merd.