Korona: Hûmara merdeyan û nêweşan zêdîyena

Goreyê doneyena peyênan ê selahîyetdaranê Tirkîya ewro rîyê janê Korona ra 27 kesanê bînan cuya xo vînî kerde û hûmara kesanê ke cuya xo vînî kerde bîye 4 hezar û 249.

Wezîrê Weşîye Fahrettin Kocayî hesabê xo yê Twîtterî ser ra derheqê rewşa peyêne ya vîrusê Korona de zanayîş pare kerd.

Goreyê zanayîşanê ke Kocayî dayî 24 saetanê peyênan de Kurdîstan û Tirkîya de 27 kesanê bînan cuya xo vînî kerde û 961 kesanê bînan de nêweşîye ameye tesbîtkerdene. Goreyê naye kesanê ke heta ewro cuya vînî kerdo hûmara înan bîye 4 hezar û 249 û hûmara kesanê ke pê nê janî kewtî bîye 153 hezar û 548.

Hetê bînî ra pêroyîya dinya de zî hûmare merde û nêweşan ê Korona girdêr bena. Goreyê doneyanê peyênan hûmara kesanê ke pê vîrusê Korona kewtî bîye 5 mîlyon û 100 hezaran ra û ya înan ke rîyê nê janî ra merdî 330 hezaran ra ravêrte. 2 mîlyon 700 hezarî ra zafêr kesî tedawî vînenî û 2 mîlyon ra zafêr kesî weş bîye.