Hemserekê Komeleya Heqanê Merdiman (ÎHD) Huseyîn Kuçukbalabanî derheqê tecrîd û grevê vêşanîye de ANFyî rê qisey kerd.

Kuçukbalabanî ard ziwan ke Tirkîya de heqê tepişteyan şinasîyayê la rixmê ney zî nênê caardene. Kuçukbalabanî vat: ''Abdullah Ocalan û embazê ci 2019 ra nata nêeşkenê avûkat û keyeyanê xo bivînê. No binpaykerdişê cidî yo. Zîndanê Îmraliyî bi xo zîndanêko taybet o, îdareyêko taybet o. Merdimê ke uca de tepişîyenê, seba çareserîya meseleya kurdan aktorê krîtîk ê. Abdullah Ocalan aktoorêko girîng o. Meseleya kurdan de hem babeta çareserîya demokratîke de hem zî rêxistina çekdare û şarê kurdî ser o wayîrê tesîrê o.''

Balabanî vist vîrî ke 27ê teşrîna peyêne ra nata vera tecrîdî û seba çareserîya meseleya kurdan tepişteyî grevê vêşanîye de yê û vat: ''2015 ra nata 8 serrî yo polîtîkaya tecrîdî bi giranî yena caardene. 2016 de Rewşa Îstîsnayîye şaristananê Kurdîstanî de amebî îlankerdene û hema zî na rewşe dewam kena. Ma sey ÎHDyî muracatê Wezîrîya Edaletî kerdbî û waştbi ke peynîya tecrîdî bîyara. 33 mengî yo Ocalanî û tepişteyanê bînan ê Îmraliyî ra xeberêke nêna girewtene. Wezîrîye heta nika cewab nêda muracatê ma. Ganî verî ke no grevê vêşanîye giranêr nêbo Wezîrîya Edaletî destûr bida ke ÎHD, keye û avûkatî şorê Îmraliyî.''

Kuçukbalabanî da zanayane ke meseleya kurdan de hînî tek rayîr çareserîya demokratîk a û vat: ''2015 ra nata şerê zereyî de 40 hezar merdiman dinyaya xo bedilnaye. Mabênê 2013-2015î de yanî wextê prosesê çareserîye de hema hema çew zî nêmerdbi. Şero ke zere, Iraq û Sûrîye de vera kurdan yeno kerdene zerarêkê pîlî dano welatî. Abdullah Ocalan seke verî vatbi seba çareserîya meseleya kurdan amade yo. Malîyetê nê şerî zî zaf giran o. La herinda şerî de mesele eşkena bi dîyalogan çareser biba.''