Vera tecrîdê serê Ocalanî û qerarê Amerîka yê vera serekan ê PKKyî Ewropa de çalakîyî dewam kenî.

Paytextê Fransa Parîs de kurdan bi çalakîyêk qerarê Amerîka yê vera Têgêrayîşê Azadîye yê Kurdîstanî û tecrîdê ser Ocalanî protesto kerdî.

Kurdîstanijî verê parlamento de bi slogana ‘‘Erdogano dîktator, Amerîkaya hemkare‘‘ hêrsê xo ard ziwan.

Qiseykerdişan de ame vatene ke ‘‘ PKK şar o û şar tîya de yo‘‘ û ame waştene ke wa PKK lîsteya terorî ra bêro vetene.

Bajarê Marsîlya yê Fransa de kurdî û dostê înan reyna verê walîtîye û konsolosxaneyê Amerîka de kom bîyî û qerarê Amerîka şermezar kerd.

Çalakwanan bi pankartan waştişê azadîya Ocalanî ard ziwan û bi fotogranê îdarekaranê PKK û KCKyî ra Cemîl Bayik, Murat Karayilan û Dûran Kalkanî bale ante qerarê Amerîka ser.

Bajarê Rennesî yê Fransa de zî bi heman waştişî Kurdîstanijî û dostê înan verê konsolosxaneyê Amerîka de ameyî pêser. Çalakwanan qerarê Amerîka û tecrîdê Îmralî protesto kerdî.

Bajarê Frankfurtî yê Almanya de zî verê konsolosxaneyê Amerîka de çalakîyêk ameye viraştene. Çalakwanan qerarê Amerîka rê hêrsê xo ard ziwan û muhîmîya rolê PKKyî ser o zanayîş da. Çalakî do roja îne heman ca de reyna bêro viraştene.

Yew bajarê Almanya ke bi rojanê bêmabênan çalakîyî yenî viraştene zî Hamburg o. Kurdîstanijî ke bi rojanê Hamburg de çalakîyan de yê vizêr zî verê parlamento de ameyî têhet. Roja îne do rayberîya cinîyan de heta konsolosxaneyê Amerîka rayîrraşîyayîşêk bêro viraştene.

Paytextê Danîmarka Kopenhag de zî verê konsolosxanyê Amerîka de çalakîya protestoyî estbî. Çalakwanan bi sloganan heskerdiş û giredayîşê xo yê PKKyî ard ziwan û Amerîka şermezar kerd.