Kurdîstan de serkewtişê weçînayîşan ê DEM Partî hetê şarî ra bi coşî yeno fîrazkerdene.

Qezaya Kerboranî ya Mêrdînî de rixmê weçînitoxanê seyaran zî DEM Partî şaredarîye girewte. Hemşaredara Kerboranî Asya Gezer şayîya fîrazkerdişî de qisey kerd. Asya Gezer îfade kerd ke Kerboran warê xoverdayîşî yo û vat: ''Ez pêro şarê ma fîraz keno. Tîya erdê Garîbe Gezer, Armanc û Hesenan o.''

Qezaya Cizîre ya Şirnexî de bi hezaran kesan serkewtişê DEM Partî fîraz kerd. Şayîye de fîşekî ameyî eştene û sloganî ameyî vatene. Hemsereka DEM Partî ya Cizîre Nûrcane Alturk şayîye de vat ke ê bi xoverdayîşî ser kewtê. Hemşaredaranê Cizîre Gulere Tunç û Abdurrahîm Durmuşî zî şarî rê sipas kerd.

Mûş de DEM Partî serkewtişêko pîl û tarîxî vist dest. Şarê Mûşî meydan de şayîya xo viraşte. Şarî pîya govende girewte û sloganê sey ''Bijî Serok Apo'' vatî. Endamanê Meclîsê Ciwanan ê DEM Partî da zanayene ke ê serkewtişê Mûşî dîyarîya Rayberê Şarê Kurdî Abdullah Ocalanî kenê. Şayîye de Wekîla DEM Partî Sumeyye Boz ard ziwan ke şarê kurdî sindoqan de cewabê îqtîdarî dayo. Hemşaredaranê Mûşî Tuba Sayilgan û Sirri Soylemezî pare kerd ke ê do şaristan de ferasetê demokratîkî awan bikerê.

Qezaya Dêrika Çîyayê Mazî ya Mêrdînî de şarî verê buroyê weçînayîşî yê DEM Partî de serkewtiş fîraz kerd. Hemşaredaranê qeza Songule Ozbahçecî û Cengîz Temellîyî tîya de qisey kerd û seba destekê ci şarî rê sipas kerd.