Goreyê doneyanê peyênan ê selahîyetdaranê Tirkîya 24 saetanê peyênan de 58 kesê bînî rîyê Korona ra merdî. Pîya bi nînan hûmara kesanê ke heta ewro Kurdîstan û Tirkîya de merdî bîye 3 hezar û 952.
Wezîrê Weşîye yê Tirkî Fahrettin Kocayî derheqê rewşa peyêne ya janê Korona de zanayîş da. Goreyê eşkerayîye Kurdîstan û Tirkîya de 24 saetanê peyênan de 58 kesê bînî rîyê Korona ra merdî. Pîya bi nînan hûmara fermîye ya kesanê ke heta ewro Kurdîstan û Tirkîya de merdî bîye 3 hezar û 952. Hûmara nêweşan zî bîye 143 hezar û 114.
Dinya de zî bîlançoya Korona girdêr bena. Pêroyîya dinya de nizdê 4 mîlyon û 368 kesî pê janî kewtî û hûmara merdayan 300 hezaran rê nizdî bena.
Hetê bînî ra goreyê doneyanê KCDK-E Ewropa de heta 6ê gulane tewr tay 97 kurdîstanijî rîyê Korona ra merdî û 600yî ra zafêr kesî pê janê Korona kewtî. Yeno texmînkerdene ke hûmara înan a raşte hîna zaf a.
