Xeylêk bajaranê Vakurê Kurdîstanî û Tirkîya de bi wesîleya 1ê Teşrîna Peyêne Roja Kobanê ya Dinya çalaki û aktîvîteyî ameyî kerdene û mesajê paştdayîşê Şoişê Rojawanî ameyî dayene.

Amed de serkêşîya rêxistina DBPyî de hetê partîyanê sîyasîyan û dezgehan ra banê partî yê Rezanî de eşkerayîye ameye dayene. Hemsereka DBPyî ya bajarî Sultane Yaray ard ziwan ke çar parçeyanê Kurdîstanî de kurdî bi serran o vera hêriş, zext, çînhesibnayîşî û îşkenceyî xover danê û vat, "Ma veng danê ke wa Kobanê rê bêro wayîrvejîyayene. Paştdayîşê Kobanê û Rojawanî xurtêr bikerê.” 

Reyna Riha, Mêrdîn, Wan, Agirî, Sêrt, Anqara û xeylêk bajaranê bînan ê Vakurê Kurdîstanî û Tirkîya de hetê HDP, DBP, HEDEP û ÎHDyî ra bi çalaki û aktîvîteyanê cîya cîyayan Roja Kobanê ya Dinya ameye selamkerdene û semedê paştdayîşê Rojawanî û xurkerdişê têkoşînî ame vengdayene.