Dima ke lîderê mafya û paramîlîterê dewleta tirke Sedat Pekerî pê tay vîdeoyan têkilîyê dewlete û çeteyan eşkera kerde mekanîzmaya 'şerê taybetî' (gayrî nîzamî) ya dewleta tirke reyna bîye babeta nîqaşan.

Serekê Rûmetî yê HDPyî Ertugrul Kurkçuyî derheqê babete de ANFyî rê qisey kerd.

Kurkçuyî pare kerd ke bingeyê mesele de nêdayîşê cewabêkê pozîtîfî yê vera meseleya kurdan esto û vat: ''Semedo ke dewlete Kurdîstan de kolonyalîzmê xo rê dewam bikera hewceya nê awanîyan, çeteyan û zorbazîye ya. Vateyê 'çeteyan dewlete esîr kerda' raşt nîyo. No bi xo tercîhê dewlete yo. Verî zî awanîya çeteyan ê sey Teşkîlat-i Mahsûsa yê Partîya Îttîhat û Terakkî Qirkerdişê Pontusan û Armenîyan kerdî, muxalefetê zereyî zî qedîna. Nika çeteyê winasênî prosesê tasfîyeya serewedaritişê kurdan de ca gênê û pêro provakasyonan anê ca.''

Awanîya çeteyan a ewroyîne zî 1948an de dima ke Tirkîya bîye endama NATOyî hetê hetkarîya Amerîka ra ronîyaye ke vera çepgîrîstanê antî-Amerîka bêra şuxilnayene. Tîya de kilîd Alparslan Turkeş o. Turkeş amebi wezîfedarkerdene ke teşkîlatêkê sivîlî awan bikero û şerê gayrî nîzamî bikero. Ewro MHP berdewamê nê tradîsyonî yo. Oyo ke Hrant Dînk, Musa Anter, Kutlu Adali yanî xoverdayoxî qetil kerdî no têgêrayîş o.''

Kurkçuyî bale ante ser ke Sedat Pekerî derheqê gefê vera Akademîsyenanê Haştîye de vatbi Erdoganî tira waşto atmosferê tersî awan bikero. Kurkçuyî vat: ''Raşta Erdoganî 2015-2016 de atmosferê tersî awan kerd. Dewlete her çî ra verî hêzo polîtîk ê îqtîdarî yo. Eke îqtîdar vajo o çîyanê winasênan qebul nêkeno o çax beno ke no atmosfer biqedo. Xora semedo ke dewlete hacetê hemparî yê serwerîye yo tay kesî vera ney vejîyenê la her çi pê hukmatî dest pêkeno. Vate ê komelî yo, çîyo ke dewlete vaje çîn o.  Çunke dewlete bi xo çete ya, Sedat Peker dewlet o. Tîya de vate kewenê milê dormeyê radîkalî yê muxalefetê demokratîkî. Ganî no vate bêro ronayene û teqîbkerdene. ''

Ertugrul Kurkçuyî da zanayene ke dewleta tirke pê îfşayanê Pekerî kewte tengîye coka naye ra pey çimanê merdiman do bitersna. Kurkçuyî vat: ''La zereyê xo de ê zaf qels bîyê çunke hê rijîyenê. Verê ma de hukmatêko winasên esto ke kewto pê. Coka têkoşînê zereyî asanêr beno la eşkera yo ke qesre çimê xo kerdê sûrî.''