Hemsereka Kongreya Komelê Demokratîkî (KCD) Leyla Guvena ke Zîndanê Sîncanî de tepişte ya, Radyoya Dengê Gelî rê qisey kerd.

Leyla Guven îfade kerd ke rixmo ke şarê kurdî û Rayberê Şarê Kurdî Abdullah Ocalan Komployo Mîyanneteweyî pûç kerdo şert û mercê esaretê Ocalanî dewam kenê. Guvene vat: ''Rayberê ma 25 serrî yo tepişte yo û 22 serrî yo zî AKP îqtîdar de yo. Despotî û zalimîya sey nêzdîbîyayîşê Erdoganî nêdîyaya. Îqtîdarê AKP-MHPyî dest na pêro heqanê Rayber Apoyî. AKP bi xo zaneno ke no kayê tecrîdî tehlukeyîn o la ancî zî perwerîya şarê ma ya bi Rayberîye ceribneno.''

Leyla Guven qala grevê vêşanîye yo ke aye serkêşîya ci kerdbî, kerde û vat: ''Mi nêwaşt ke verê îşkenceyê tecrîdî de bêveng bimana. Mi waşt ke rayîrê embaze Sakîne Cansiz û ê bînan teqîb bikera. Ma o çax mesuldarîya xo arde ca. Embazanê ma grevê vêşanîye de seba Rayberîye ganê xo feda kerdî. Ganî mi seba Rayber Apoyî û şehîdanê ma têkoşînêko xurtêr bikerdêne.''

Guvene dîyar kerd ke îşkenceyê tecrîdî dewamê Komployê Mîyanneteweyî yo û vat: ''Ma bawer nêkerdêne ke tecrîdê Îmraliyî pêro zîndanan û waranê cuye ra do vila biba. Ma nêeşkayî bi qîmî zelal bikerê ke nêzdîbîyayîşê bi Rayberîye nêzdîbîyayîşê bi şarê kurdî yo. Ganî ma vera tecrîdî plansazîya xo raşt bikerê û bi waştişanê zelalan wurzê payan ser. Seba ney Hemleya 'Abdullah Ocalanî rê Azadîye, Meseleya Kurdan rê Çareserîye' gamêka destpêk a. Nê prosesî de hînî wedarîyayîşê tecrîdî qîm nêkeno; ganî Rayber Apo bêro azadkerdene.

Ganî ma xo vîr a nêkerê ke bi kamyew îmkanan resayî nê rojan. Şehîdanê ma Sara, Kemal, Xeyrî, Fîkrî, Sema, Mazlûm, Zulkuf û Aytene xoverdayîş teslîmê ma kerd û ma resnayî nê rojan. Rayberê ma rixmê tecrîdê giranî de 24 serrî yo têkoşîn keno. Şert û mercî giran ê la çîyo nemumkîn çin o. Ma rê ruhê serewedaritişî lazim o ke serranê 1900an ra heta 2000î est bi. Ganî her kes dêsan ser de bi herfanê zernênan binuso ke Îmrali de tecrîd est o, zîndanan de grevê vêşanîye est o û her sanîye zî zaf girîng a.''