Hewteyêkê vîyarteyî ra nata Lîbya de ke hedefê dewleta tirke de ya, serebûtê ecêbî qewimîyenê. Tewr peyên Hakan Fîdan şibi Lîbya.

Menga peyêne de Lîbya de tay serebûtî qewimîyayî; Sekreterê Pêroyî yê Neteweyanê Yewbîyayeyan seba vîrusê Korona adirbirnayîşêko global kerd la dewleta tirke menga nîsane de vera hêzanê Serfermandar Halîfe Hafterî operasyonê bi nameyê ''Volkanê Hêrsî'' da destpêkerdene. Çarçewa operasyonî de bendê qeraxî yê Trablusî û tay cayê serê sînorê Tunusî kewtî binê kontrolê UMHyî. Vervatoxê Artêşa Neteweyî ya Lîbya (LUO) Ehmed El Mismarî da zanayene ke hêrişî hetê fermandaranê tirkan ra ameyî koordînekerdene û xeta Surman û Sabratha ser o cergê pabesteyê DAÎŞî, EL Kaîde û Ensar Eş-Şerîatî estê.

Hêrişan ra dima LUO ame xo ser û sere de Tarblus, Misrata de zaf cayan de darbê pîlî dayî artêşa tirke ro. Artêşa tirke zî reyna dest pê sewqîyatê leşkeran kerd.

Keyepelê Al Arabia xebera xo ya 7ê gulane de da zanayene ke Hakan Fîdanî hewteyêkî verê cû Lîbya zîyaret kerd û Sûrîye ra zaf leşkerî sewqê Lîbya kerdî. 5ê gulane de zî Erdoganî vatbi ke ê do nêzdî de Lîbya ra 'tay mujdeyan' bigêrê.

Zîyaretê Hakanî Fîdanî ra dima zî nê serebûtî qewimîyayî; Hêverî serekê îstîxbaratî yê UHMyî Abdulkadîr Tuhamî ame kiştene. Ame parekerdene ke Tuhamî krîzê qelbî ra merd la LUOyî eşkera kerd ke Tuhamî ame remnayene û pê îşkence ame kiştene.

Zîyaretê Hakan Fîdanî ra dima cergê El Kaîdeyî Xalîd El-Şerîf hetê dewleta tirke ra seba odaya operasyonê Trablusî ame wezîfedarkerdene. Reyna nê zîyaretî ra dima vera qezaya Zavîye Ed-Dahmanî ya ke tede sersefîrîyê Tirkîya û Îtalya estê hêrişê bi fuzeyan ame kerdene. Nê hêrişî ra dima Wezaretê Karanê Teberî yê Tirkîya na eşkerayîye daye: ''Eke menfaat û temsîlkarîyê ma yê Lîbya bêrê hedefkerdene ma zî hêzanê Hafterî bikerê hedefê meşrûyî.'' Heman senaryo serra 2014î de seba îşxalkerdişê Sûrîye zî amebi xebitnayene. A serre musteşarê MÎTî Hakan Fîdanî seba îşxalkerişê Sûrîye vatêne: ''Ez do 4 merdiman bierşawa a hete, 8 fuzeyan zî bierza warêkê vengî. Seba îşxalî ma eşkenê bahaneyêke bivîne, mesele nîya.''

Raşta zî dewleta tirke îşxalê Cerablus, Ezaz, Babî ra 4 rojî verê cû 24ê tabaxa 2016î de Dîlok de pê destê DAÎŞî vera veyveyêkê kurdan hêrişêk amade kerdbi.

Îşxalê Efrînî ra ver zî dewleta tirke îdîa kerdbi ke Efrînî ra ver bi Hatayî hawan ame eştene la dima ame eşkera kerdene ke hawan Tirkîya ra amebi eştene. Heman bahane îşxalê Girê Sipî û Serêkanîyê ra ver zî amebî xebitnayene.