Dewanê Entax, Gom û Bamitnî yê qezaya Licê ya Amedî vizêr serê sibayî hetê leşkeran ra şewat vejîya ke hema zî dewam keno. HDP, Partîya Çep a Keske, DBP, pabesteyê Platformê Kede û Demokrasîyî, Têgêrayîşê Ekolojî yê Mezopotamya, pabesteyê Platformê Bajarî yê Amedî, MEBYA-DER, Dayîkê Haştîye û Komelya Ekolojî ra heyetêkî seba ke derheqê şewatî de cipesayîş bikero şi herême.

Ma do pîya bi şarê xo xozaya Kurdîstanî bipawê

Heyetî ke dewanê Entax, Gom û Bamitnî de cipersayîşî kerdî tîya eşkerayîye daye. Eşkerayîye de pankartê ''Êyê ke wayîrê tarîx û xozaya xo nêvejîyenê nêeşkenê ameyoxî bewlî bikerî'' , ''Li diji Faşîzmê em bibin daristan''  ameyî akerdene. Îdarekaranê Komeleya Ekolojî ra Murat Bilgîç ke tîya qisey kerd bale atne ser ke şewatî rê zaf erey mudaxale ameyo kerdene û nê vatî: ''Na herême de yew aşme de hîrê rey şewat vejîya. Hîrê heme şewatî zî şikdar ê. Ma do sey dezgeh û komelanê sîvîlan ê herême do nê teqîp bikerê. Ma do pîya bi şarê xo xozaya Kurdîstanî bipawê.''

Ma do bi hêzê xo wayîrê xo bivejîyê

 Wekîla Partîya Çep a Keske Ceylane Cupalo ya Akça zî vist vîrî ke yew aşme de hîrê rey şewat vejîyayo û wina vat: ''Di şewatê verênî bewlî bi hetê kamî ra vejîyayî, no hema zelal nêbîyo la şikdar o. Wa sûcî mererzê bedilnayîşê ekolojî û germîya globale ser.  Ma zanê ke ewro Cûdî de Gabar de şewat yeno vetene û şaro ke wazeno şewatî hewna bikero  ci rê mudaxale  yeno kerdene. Reyna ma zanê  ke dewanê Licê de qirkerdişê daran û xoza yeno kerdene. No şewat zî nînan ra xoser nîyo.  Ma vatêne qeyûmî qerarê sîyasîyî yê. Nê şawt zî polîtîk ê. Tewirê mudaxalekerdişê nê şewatan zî polîtîk o. Tedbîrê ke vera germîya globale nînê girewtene zî polîtîk ê. Vera nê heme tewiranê sîyasîyan ê hêrişanê dişmenkî  ma do sey şarê kurdî, Parîya Çep a Keske rêxistinbîyayîş, xopawitiş mudahalekerdişê xo aver berê. Ma do paştî bidê nê şarî. Ma do bi hêzê xo wayîrê xo bivejîyê.''

Badê eşkerayîye de heyet dewa ra agêra.