Dîmenêk vejîya werte ke tede yeno belgekerdene ke daristananê herêmanê Besta û Cûdîyî yê Şirnexî qestî ra vêşnena. 

Dîmenan de leşkerê tirkî bi kêfweşî waranê vêşayeyan mojnenê û qala sûcê xo kenê.

Nêzanîyeno ke dîmenî key û kamyew qereqolî de ameyê girewtene. Leşkerê ke dîmenî gênê îtîraf kenê ke înan bi xo daristanî dayê adirî ver.

Leşkerêk dîmenan de vano ''No yo halê Besta yo peyên, no zî Kurt o.'' Leşkerêko bîn vano ''Operasyon temam o.''

Yewna leşker wesfê vêşnayîşî keno. Qiseykerdişanê leşkeran ra eşkera beno ke binê Koyê Cûdîyî dîyayo adirî ver.

Dîmenan de leşkerêk zî vano ''Embazan tîya bi hawanî teqna.''

Dîmenan ra eşkera beno ke warê Kurdîstanî yê bînî zî hetê leşkeran ra yenê vêşnayene.

Artêşa tirke ya îşxalkere her hamnanî qestî ra daristananê Kurdîstanî vêşnena, daran birnena. Tewr peyên par nêzdîyê Koyê Cûdîyî de daristanê dewa Sorbitme û Gera Mihetê dîyabî adirî ver. Daristanê ke yenê vêşnayene qereqolan ra nêzdî yê û leşkerî nêverdanê ke şarê herême şewatan hewna bikero.