Derheqê rojnameger Mark Campbell û aktîvîste Bêrîtane Silêmanî de seba ka ala PKKyî akerdbî dewa amebî akerdene. Dewa paytextê Îngilîstanî London de ameye kerdene.

Aktîvîste Margarete Oven, rojnameger Alaadîn Sînayîç, nuştox Alî Poyraz, nuştoxe Rahila Gupta û endamê Meclîsê Şarê Kurdî zî tewrê dewa bîyî.

Roniştişê dewa ra verî pankarta ''Peynîya krîmînalîzekerdişê kurdan û hemkarîya dewleta tirke bîyarê'' ameye akerdene.

Rojnameger Mark Campbellî roniştişî ra verî ajansê ma rê qisey kerd. Campbellî pare kerd ke hukmatê Îngilîstanî xîret kena ke meseleya kurdan bikero sûc û vat: ''Iraq, Tirkîya û Sûrîye vera kurdan polîtîkayanê qirkerdişî anê ca. Coka ewro ma tîya de yê. Ma venga hukmatê Îngilîstanî danê ke seba çareserîya meseleya kurdan têbigêro û na mesele ser o ma sûcdar nêkero.''

Bêrîtane Silêmanî vat: ''Ma sey kurdan têkoşînê heqdarî kenê. Êyê ke ma muhakeme kenê wa bizanê ke ma do qetî têkoşînê azadî û haştîye ra fek vera nêdê. Azadîye do biba yê kurdan.''

Wextê roniştişê dewa de Campbell û Bêrîtane bi 'propagandaya terorî' ameyî sûcdrkerdene. Dima polîsanê ke 2022 de çalakîyêke de Campbell û Bêrîtane destbend kerdî beyanê xo dayî û ala PKKyî sey delîlî ameye mojnayene. 

Dima avûkatanê Campbellî û Bêrîtane qala têkoşînê kurdan û polîtîkayanê dewleta tirke yê vera kurdan kerde. Avûkatan da zanayene ke dilama û alê ke a roja çalakîye de ameybî akerdene fikranê haştîye yê Abdullah Ocalanî mojnenê.

Roniştişê diyînî de 'pisporê' polîsanê şehîdan ame goşdarîkerdene. Balkêş o tîya de dîya zanayene ke polîsî 'wikipediya' ra musayê ke a ale ala PKKyî ya. Naye ser o avûkatanê Campbell û Bêrîtane vat: ''Doneyê ke bingeyê înan ê zanistî çin ê, seba krîmînalîzkerdişê kurdan şuxilîyenê''

Pawitişê avûkatan ra dima roniştiş qedîya.

Heyetê mehkeme 30ê çeleyî de bira xo ya serê dewa do eşkera bikero.