Seba paştdayîşê grevê vêşanîye û rojeyê mergî yê ke seba wedaritişê tecrîdê serê Rayberê Şarê Kurdî Abdullah Ocalanî ameyê destpêkerdene, Londra de rayraşîyayîşêk ame viraştene.

Endamê Yewîya Hêzê Demokratîkî ya Brîtanya ya ke tewr kêmî 20 sazgehê Kurdistan û Tirkîya ra mîyanê ci de ca gênê, vernîya Cîvîc Centre yê herêma Wood Greenî de ameyî têhet.

Serekê Federasyonê Elewîyan ê Brîtanya Îsrafîl Erbîlî da zanayene ke grevê vêşanîye yê seba wedaritişê tecrîdê serê Rayberê Şarê Kurdî Abdullah Ocalanî, tarîxêkê muhîmî nusenê. Erbîlî vat, “Grevê vêşanîye 6 mengî xo pey de verdayî. 30 hevalanê ma grevê xo yê vêşanîye bedilnayî bi rojeyê mergî.”

Qiseykerdişan ra dima, girseyî dest bi rayraşîyayîşî kerd. Rayraşîyayîşî de alayê ke fotografê Ocalanî ser o estê û fotografê xoverdayoxanê grevê vêşanîye ameyî akerdene. Rayraşîyayîşî de derheqê grevê vêşanîye de bi hezaran vilawekî ameyî vilakerdene.

Girseyo sixlet bado vernîya Merkezê Cimatî yê Kurdan ê Harîngehî de hetê çalakgeranê grevê vêşanîye Nahîde Zengîn û Mehmet Saît Yilmazî ra ameyî pêşwazkerdene ke 14’ê Adare ra nata grevê vêşanîye de yê.