Şarê Mêrdîn, Êlih û Xelfetî dormeyê şaredarîya xo de kom beno û dîya keno ke ê do bi xoverdayîşî kolonyalîstan ra bixelisê.

Mêrdîn

Endamanê DEM Partî tayînkerdişê qeyûmî yê vera Şaredarîya Mêrdînî protesto kerd.Hemşaredarê Mêrdînî Ahmet Turk û Devrîme Demîr û xeylê merdimî şîyî verê şaredarîye.

Polîsan bi tirsan hêrişê girseyî kerd û nêverda ke girse debikewo şaredarîye. Wekîla DEM Partî Bêrîtane Guneş tîya de vat: ''Şima de rî nêmendo ke biewnê doman û keyeyanê xo ra. No şar do sereyê xo nêaro war.''

Şar bi sloganan tayînê qeyûman protesto keno.

Êlih

Şaredara êlihî Gulîstane Sonuk şîye verê şaredarîye û hetê girseyî ra bi sloganan ameye pêşwazîkerdene.

Gulîstane Sonuk çalakîye de vat: ''Wa Walî bêro tîya û vajo ke senî pereyê şaredarîye xesp kerdo, qedînayo û 3 mîlyar deynî verdayê. Wa Walî bêro vajo 'Mi şima binê deynan de verdayî, nika zî ez ameya ke tîya xesp bikera. Qeyûmî bi akreban, wesayîtanê zirxînan, kîrpîyan şaredarîye xesp kerda. Ma venga şarê Êlihî, cinîyan, ciwanan û pêro kedkaran danê ke şaredarîye yê ma ya. Ma do bi xoverdayîşî kolonyalîstan ra bixelisê.''

Xelfetî

Verê Şaredarîya Xelfetî ya Riha de bi beşdarîyan Hemşaredaran Sanîye Bayram û Mehmet Karayilanî, Hemvervatoxa Komîsyonê Huqûqî yê DEM Partî Sevda Çelîk Ozbîngol, Hemserekê DEM Partî yê Riha Bekîr Karakeçîlî, temsîlkaranê Şubeyê OHDyî û xeylêk kesan çalakîya prostestoyî yena kerdene. Bînaya şaredarîye binê ablûqa de ya.

Hemşaredar Mehmet Karayilanî vat: ''Bira tayînkerdişê qeyûmî seba ma çin o. Ma na bire nêşinasnenê. Ma bi hêzê şarê xo tîya de yê û ma do erkanê xo rê dewam bikerê. Êyê ke îradeyê şarê ma rê tehamul nêkenê do bin bikewê.

Wekîlê DEM Partî yê Riha Omer Ocalanî vera tayînkerdişê qeyûman nêrazîbîyayîşê xo mojna û vat: ''Ma do şarê xo reyde vera neheqîye têkoşîn bikerê.''