Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Berlin  û Halle de kombîyayîşê şarî  ameyî kerdene.

Paytextê Almanya Berlin de, serkêşîya Meclîsê Cinîyan ê Dest-Danî û Meclîsê Nav-Berlinî de kombîyayîşê şarî ameyî kerdene. Bi seyan kesî tewrê kombîyayîşî bîyî. Hemsereka KCDK-E Zubeyde Zumrut û avûkatanê Rayberê Şarê Kurdî ra Omer Guneşî kombîyayîş de qisey kerd.

Hemsereka KCDK-E Zumrute îfade kerd ke 3 serrî yo Rayberê Şarê Kurdî ra xeberêke nêna girewtene û vat: ''Ganî ma vera sîstemê tecrîd û îşkenceyê Îmraliyî dormeyê Rayberîye de biciwîyê. Seba ke azadîya Rayber Apoyî bîyarê ca ma ganî wayîrê na hemle vejîyê.''

Zumrute bale ante ser ke qedexeyê vera PKKyî û tecrîdê Îmraliyî pabesteyê yewbînan ê û vat: ''18ê teşrîna peyêne de vera qedexeyê serê PKKyî bi şîarê 'qedexe wedarnê, demokrasî xurt bikerê' ma Berlin de rayraşîyayîşêkê xurtî bikerê. Wa şar û dostê ma bi xurtî tewrê nê rayraşîyayîşî bibê.''

Omer Guneşî zî dîyar kerd ke şarê kurdî seba azadîya Ocalanî têkoşînê xo tim gêş keno.

Şaristanê Halle yê Almanya de Hemsereka KON-MEDî Rûkene Akça û sîyasetmedar Faysal Sariyildizî qisey kerd. Rûkene Akça ard ziwan ke ganî şarê kurdî serkêşîya hemle bikerê û seba azadîya Rayberê Şarê Kurdî Abdullah Ocalanî têkoşînî berz bikerê. Sariyildizî pare kerd ke qedexeyê vera PKKyî bîyo sebebê sûcanê vera kurdan.