Doza Hemserekê Pêroyî yê HDPyî yê verên Selahattîn Demîrtaşo ke 4ê teşrîna peyêna 2016î ra nata tewqîfkerde yo, Anqara de dest pêkerde. Demîrtaş bi rayîrê telekonferansî (SEGBÎS) beşdarê doze bi.

Demîrtaşî dîyar kerd ke o mecbûr mendo ke bi telekonferansî pawitişê xo bikero û wina va: “Ameyîş û şîyayîşê ma yê Anqara qasê 24 saetan dewam keno. Seba ke weşîya mi baş nêbîye, mi telekonferans qebul kerd. Wa bêro zanayene.”

OPERASYONÊ FEHMÎ AME KERDENE

Demîrtaşî qala weçînayîşê 24ê hezîrane kerd û wina va: “Weçînayîşê 24ê hezîrane û doza mi ser o xeylê operasyonê fehmî ameyî viraştene. Serekkomar û Serekkwezîrî ge-ge roje de 3 reyî, ge-ge zî roje de 5 reyî mi sucdar îlan kerdî. Şima şênayêne mi serbest veradî û şewa weçînayîşî reyna tewqîf bikerî. Ma do nêremayêne.”

Demîrtaşî dewamê qiseykerdişê xo de va ‘eke mi biwaştêne, bi desan reyan seba remayîşî firsendî estbî’ û wina domna: “Labelê şima qerarê tewqîfbîyayîşî da. Namzedêk heme îmkananê dewlete şuxulnayêne û roje de 3-5 mîtîngî viraştêne, labelê îmkanê mi çinêbî. Sebebê nêyî heyetê mehkeme bi. Avûkatanê mi bi desan reyan muracatê Mehkemeya Qanûnê Bingeyî kerdî, labelê mehkemeye hîna doza mi ser o nêvindeta. Weçînayîş bi û qedîya, labelê hîna mehkemeye dest bi ewnîyayîşî zî nêkerdo.”

MA EYNÎ KEŞTÎYE DE NÎYÎ

Demîrtaşî qiseykerdişê xo de wina va: “Mi şar pawit û bindestî pawitî. Tayê partîyê muxalefetî wina nîşan danî ke seke krîz xafila ameyo. Labelê wina nîyo. Tayê partîyî vanî ‘ma eynî keştîye de yî’. Ez zî namzedê Serekkomarîye bîya. Labelê ez eynî keştîye de nîya. Ez keştîya feqîran de ya. Ez keştîya talankeran de nîya. Keştîya înan rind a û ê awe de nêşonî. Cok ra ma eşnî keştîye de nîyî. Eke mi bişênayêne qala nêyî bikerdêne, o wext do cîya bibîyêne. Hîleyo tewr gird, zîndan de verdîyayîşê min o.”

MÎYANÊ SERRÊK DE 33 DOZÎ ABÎYÎ

Demîrtaş bi îdîayanê ‘Rêxistina terorî awan kerdene û îdare kerdene’, ‘propogandaya rêxistine kerdene’ û ‘pesnê suc û sucdarîye dayene’ ra yeno mehkeme kerdene û seba Demîrtaşî heta 142 serran cezaya zîndanî yena waştene.