Wareyanê Hasandînî yê qezaya Pasûrî yê Amedî de hacetê sondajî yê şîrketêk bi destê leşkeran ameyî cakerdene. Şîrketa madenî bi rayîrê sondajî nimûne herême ra girewte. Nê karê madenî do tesîrê dewanê Nêrçik, Şînas, Dimilyan, Hêlîn, Beyrok, Înîkayî bikerê.

Dewijanê Nêrçikî ra Recep Aslanhanî ard ziwan ke ê herême de mêşê hingimênî weye kenê û no çimeyê debara înan o. Aslanhanî vat: ''Qeymeqamî aşmêke verî cigêrayîşê madenî ser o kombîyayîş kerd û bi rayîrê muxtaran xebera madenî daye ma. La ma qebul nêkerd. Rixmê ney zî şîrketa madenî bi leşkeran ameye dewe. Ma nînan rê zî vat ke ma ney qebul nêkenê.Hasandîn koyê Pasûrî yo tewr berz o. Awa ma zaf a la şîrkete do awa ma bibirna. Eke dînametî biteqê yan zî karê sondajî dest pêbikero jehr do bikewo mîyanê awa ma.''

Aslanhanî da zanayene ke çimeyê înan yê cuye herême de yê û ê nêwazenê ke herême biteriknê. Aslanhanî vat: ''Awbendê Gelîya Godernî tesîrê dewanê bînan keno la no do xeylêk dewan çin bikero. Karê madenî ra dewî do bêrê xalîkerdene. Xora welat de karê heywankarî û zîretî nêmendî. 

Seba menfaetanê şîrketan ê erdê ma roşenê. Xîret kenê ke ma nê cayî ra surgun bikerê. Ma erdê xo de maden, HES û awbendan nêwazenê. Ma nêwazenê ke erdê xo biteriknê. Ma vera ney wurzê payan ser. Ma wazenê vengê ma bêro eşnawitene.''