Endamê Meclîsê Eyaletê Hamburgî yê Almanya Martîn Dolzerî, bi wesîleya Roja Girewteyanê Sîyasî ya Dinya eşkerayîyêka nuştekîye daye. Dolzerî ard ziwan ke ê paştdayîş danê çalakîyanê grevê vêşanîye yê çar hetanê dinya de seba wedaritişê tecrîdkerişê Rayberê Şarê Kurdî Abdullah Ocalanî yenê viraştene.

Dolzerî bi taybetî bale ante serê xoverdayîşê hepisxaneyanê Tirkîya û Vakurê Kurdistanî û da zanayene ke, seba ke waştişê çalakwananê grevê vêşanîye bêrê caardene, wezîfe keweno serê milê hukmatê Almanî yê federalî. Dolzerî hukmatê federalî ra waşt, seba ke Tirkîya newe ra biba dewletêka huquqî, zext ci rê bikerê. Dolzerî vat, “Labelê dewleta Almanî sey Tirkîya sîyasetmedaranê Kurdan muhakeme kena, ganî no êdî biqedîyo.

Parlamenter Martîn Dolzerî ard vîrî, teyna Hamburg de semedê madeyê qanûnê bingeyênî yê 129b ra 3,5 serre cezaya hepisxaneyî 4 aktîvîst û sîyasetmedaranê Kurdan rê ameye birnayene.

Dolzerî dewamê qiseykerdişê xo de wina vat, “Hukmato federal ganî hemkarîya ke hêzanê asayîşanê Tirkan reyde keno biqedêno û çekan nêroşo ci rê. Seba şîrketanê Almanî yê ke Tirkîya de xebat kenê êdî kredîyê Hermesî nêro dayene. Qedexekerdişê serê PKK’yî yê Almanya bêro wedaritene. Aktîvîst Erdal Gokoglu yo ke hepisxaneyê Hamburgî de girewte yo û seba ke Tirkîya de îşkence dîyo, rewşa ci ya weşîye baş nîya, ganî bêro veradayene.”