Dima ke Prosesê Dîyalogan hetê Erdoganî ra ame wedaritene Mayanê Haştîye  verê Qesra Dolmabahçe ya Îstanbulî de serrêke û hîrê mengan çalakîya roniştişî kerdêne. Mayî nê prosesê çalakîye de ge ge maruzê hêrişan bîyî.

Mayanê Haştîye ra Gulere Bugday û Bedîa Gokgoz qala ê prosesî kerde.

Dayîke Gulere Bugdaya ke mîyanê Înîsîyatîfê Mayanê Haştîye de 21 serrî yo çalak a, vat îqtîdarî ra ber kesêk şer nêwazeno. Dayîke Gulere vat: ''Wexto ke prosesî dest pêkerd ma pê şa bîyî. Pêro kurdan wina hîs kerd. Meseleya kurdan pê AKPyî dest pênêkerda, meseleya se serran a. Rayîrêk nêmend coka domanê ma şîyî koyan. Dîyalog esas o. Hukmatî verê dîyalogan girewt. Ma kulturê xo, nasnameyê xo pê pereyan rotê? Kesî ê nêdayê ma coka nêeşkenê ma ra bigêro.''
Dayîke Gulere ard ziwan ke wexto ke masaya dîyalogan rijîyaye ê pê hîsê haştîye şîyî verê berê Qesra Dolmabahçe. Dayîke Gulere vat: ''Domanaê ma seba haştîye dinyaya xo bedilnaye. Kişîyayîşê Ceylane Onkol mîsalê gemarîya nê şerî yo. Ma vera nê cînayetan gêrenê rayaumûmîye. Ez amedij a. Uca de koy, kerra, bax û baxçeyî nêverdayî. Erdê ma de înan pelêk nêverda la erdê tirkan de pelêk zî nêveşa. Mesele na ya. Wa her kes pê fam bikero.''

Dayîke Bedîa Gunduza ke 9 serrî yo mîyanê înîsîyatîfî de ca gêna vist vîrî ke senî ke proses qedîya înan dest pê çalakîya roniştişî kerd û vat: ''Komê haştîye zî ameyî, ma rê vatêne beno ke haştîye bêra. Ma vat eke ma verê Dolmabahçe de ronişê beno ke reyna haştîye yena. Înan ma erdî ra kaş kerdî, cisimî eştî serê Dayîke Zeynebe.  Ma qerenfîî eştî dengizî, seba haştîye. Mi amîrêkê polîsan rê vat 'Hînî çareyêke menda, ez do xo bierza dengizî.' Kesê ke selam dayî ma ameyî destbendkerdene. Ma verê qeymeqamî, walîtîye de roniştî. Destê ma ra çi ameyo ma kerd.''

Dayîke Bedîa peynî de vat ke ê vengê haştîye yê pêro dadîyan ê û her serê sibayî ê pê bawerîya haştîye şîyar benê. Dayîke Bedîa vat: ''Hêzê min ê haştîye hêvîya min a haştîye ya. Ez do na hêvî geş bikera.''