Vervatoxa Meclîsê Cinîyan ê DBPyî Aynure Sarica Amed de derheqê rojdemî de kombîyayîşê çapemenîye de qisey kerd.

Sarica îfade kerd ke weçînayîşanê gulane ra dima prosesê rexnekerdiş û rexnedayîşî dewam keno û ê do sey DBPyî rexneyanê xo qetî bidê.

Sarica bale ante tecrîdê vera Rayberê Şarê Kurdî Abdullah Ocalanî ser û vat: ''Ê kenê ke têkilîya kurdan a bi Ocalanî bibirnê la do pê ney nêeşkê. Se beno wa bibo ganî tecrîd bêro şiknayene. Tecrîd Îmraliyî ra vilayê pêro zîndanan bi. Cinîyê kurdî tecrîdî qebul nêkenê û vera ci têkoşîn kenê.''

Sarica vist vîrî ke tepişteyê nêweşî vera nêdîyenê û ard ziwan ke dewlete bi nê hawayî mesaj dana. Sarica waşt ke wa pêro tepişteyê nêweşî vera bidîyê. Sarica vat: ''Zîndanan de polîtîkaya tecrîdî û teber de pê destê hêzanê asayîşî polîtîkayê şerê taybetî dewam kenê.''

Sarica pê hesna ke komxebata TJA ya serê Lozanî de beşdarîyêka girînge est bîye. Sarica pare kerd ke dewlete wazena ke Peymana Lozanî rê dewam bikera û vat: ''Ma sey cinîyanê DBPyî seba heqanê cinî, doman, merdiman û heqanê ziwanî xoverdayîşêkê tarîxîyî kenê. Têkoşînê ma hîna zaf kuçeyan de dewam keno. Ma vera serdestîya camêrdan têkoşînê xo kuçeyan de pîlêr bikerê û her ca de bi felsefeya 'Jin, Jiyan, Azadî' xo ver bidê.''