Merdimê xoverdayoxan: Çalakîyî meşrû yê, ma paştî danê înan

Nacî Sumelîyo ke lajê ê û Sûat Gunanayo ke birayê ci grevê vêşanîye de yo, vat grevî meşrû yê û ê do heta peynî paştî bidê înan.

Nacî Sumelîyo ke lajê ê 75 rojî yo grevê vêşanîye de yo û Sûat Gunanayo ke birayê ê 159 rojî yo grevê vêşanîye de yo, derheqê grevanê vêşanîye yê 7 hezar tepişteyanê sîyasîyan ê zîndananê Tirkîya û Vakurê Kurdistanî de qisey kerd.

‘Grevê Vêşanîye Hemverê Kerdenanê Antî-Demokratîkan de Çalakîyêka Rast a’

Sumelîyî vat ke lajê ê bi hawayêkê nêheqî bi serran o zîndan de yeno tepiştene û vist vîrî xeylî tepişteyê sîyasîyî yê Kurdî sey lajê ê bê delîl û îspatan bi qeraranê sîyasîyan ameyê tepiştene. Sumelîyî da zanayene ke tepişteyî heqanê xo yê demokratîkan ra bêpar ameyê verdayene û vat, “Îmkanê mucadeleyêkê demokratîkî seba kesanê ke teber de yê rê zî nêameyê verdayene. Şideto ke no çend rojî yo hemverê mayan, hemseran û wayanê ma de yeno kerdene na yewe îspat kenê. No hal ramojneno ma ke na çalakî çalakîyêka rast a.”

Sumelîyî heman wextî de vat rixmê zext û zordarîyan de zî ê do domananê xo dir bê û vat, “Seba bi destfînayîşê heqanê demokratîkan ê ke înan bi grevê vêşanîye ardê ziwan çi destê ma ra bêro ma do bikerê. Ma do tim înan dir bê. Ma veng danê dewlete ke qanûnanê xo bica bîyaro.”

‘Kam Raye Bido AKP’yî O Hemparê Nê Zulmî yo’

Sûat Gunanayo ke birayê ê rê cezaya heta bi hetayî amîya dayene û 14 serrî yo tepişte yo û 159 rojî yo ke grevê vêşanîye de yo, ard ziwan ke waya ê zî çalakîyanê grevê vêşanîye de amîya destbendkerdene. Gunanayî da zanayene ke ê bi keyeyî paştî danê grevanê vêşanîye û vat, “AKP’yî goreyê xo dînêk awan kerdo. Bi nameyê Îslamîyetî zulm keno. Êyê ke paştî danê AKP’yî ganî hendî bibê haya. Wa paştî nêdê nê zulmî. Înanê ke paştî daya nê zulmî seke bi xo zulm kerdo. Êyê ke raye danê înan, hemparê qirkerdişê înan ê.”