Rexistinanê elewîyan sey Komeleyanê Elewîyanê Demokratîkan (DAD), Federasyonê Elewîyanê Bektaşîyan (ABF)  Federasyonê Komeleyanê Elewîyan (ADFE) Konfederasyonê Yewîya Elewîyanê Ewropa (AABK), Weqfa Kulturê Anadoluyî ya Haci Bektaşî Velîyî, Komeleyê Kulturê Elewîyan, Komeleya Kulturî yê Pîr Sultan Abdalî (PSAKD), Weqfê Cemî û Federasyonê Elewîyan ê Anadolu Kadikoyê Îstanbulî de bi şîarê ''Perwerdeyo laîk, cuya bi merdimi, Tirkîyaya demokratîke'' mîtîng viraşt.

Xeylêk partîyanê sîyasîyan, rêxistinanê komelê sîvîlî û deszgehan paştî daye mîtîngî. Hemsereka Pêroyî ya HEDEPî Tulaye Hatimogullari zî tewrê mîtîngî bîye.

Badê rêzgirewtişê semedê şehîdanê demokrasîyî Serekê Pêroyî yê Federasyonê Elewî Bektaşî Mustafa Aslanî qisey kerd. Aslanî ard ziwan ke ganî komare biba demokratîke û vat, ''Ma sey elewîyan tim wazenê ke wa her kes bi nasname û rengê xo biciwîyo. Mektebanê dewlete de çew nêeşkeno yew bawerî ma rê ferz bikero. Wa her kes hadê xo bizano. Ganî Dîyanet bêro wedaritene. Şar vêşanîye ra çopan ra werd arêdano, êyê ke dewlete ra dizdîye kenê, heta zereyê keyeyê ma destê xo derg kenê. Tayî wazenê ke kulturê xo, polîs û elewîyanê xo biafirnê. Ma do desturê nê medê.''

Dima ra eşkerayîye çapemenîye ameye wendene. Eşkerayîye wina ame vatene: ''Ma êyê ke rîyê bawerî, nasname û fikrê sîsyasîyî ra ameyî cîyakerdene ma do verê zextê îqtîdarê AKP-MHPyî de çok medê û destûr medê tarîtîye. Ma do pêro pîya vera nê îqtîdarî têkoşîn bikerê. Erey ya zî rew ma do miheqeq ser bikewê.''