Amed de partîyanê sîyasîyan û têgêrayîşanê kurdan êyê ke Xebatê Îtîfaqê Kurdîstanî de ca gênê da pêhesnayene ke şayîyê Newrozî rîyê virusê Korona ra ameyî îptalkerdene.

Kongreya Komelê Demokratîkî (KCD), Têgêrayîşê Cinîyan ê Azadan (TJA), Partîya Herêmanê Demokratîkan (DBP), Partîya Demokratîke ya Şaran (HDP), Partîya Azadîye, Komeleya Şorişgêran ê Demokratîkan a Kurdan (DDKD), Partîya Merdimî û Azadîye (PÎA), Partîya Komunîste ya Kurdan (KKP), Platformê Demokratanê Kurdîstanî yê Vakurî (PDK-Vakur) derheqê Newroze de banê KCDyî de kombîyayîşê çapemeyî kerd.

Hemserekê KCDyî Leyla Guven û Berdan Ozturk, hemserekê DBPyî Salîha Aydenîz û Keskîn Bayindir, vervatoxa TJA Ayşe Gokkan û temsîlkarê partîyanê kurdanê ke  Xebatê Îtîfaqê Kurdîstanî de yê tewrê ci bîyî.

Eşkerayîye de dîya eşnawitene ke mîtîngê Newrozî rîyê virusê Korona (Kovid-19)  ra ameyî îptalkerdene. Eşkerayîye de wina ame vatene : ''Ma  semedê şayîyanê biheybetan ê Roşanê Newroze xo amede kerd la  çi heyf o ke rîyê virusê Korona yo ke her roje vila beno ma  qerarêko newe girewt. Xora yeno zanayene ke şayîyê Roşanê Newroze sey mîyanneteweyî yenê kerdene, her hetî ra tewirbîyayîşî benê. No zî hetê virusê Korona ra rîsk o. Vera tehlukeyê Korona sey tedbîrî ma aktîvîteyanê kitlekî yê Newroze îptal kenê û wazenê ke naye şarê xo  û komelê rayapêroyî rê bidê eşnawitene. Ma wazenê naye zî vajê ke no semedê ma zî qerarêko rehet nêbi la hetê sîyasî û ehlaqî ra ma semedê weşîye mecbur mendî ke nê qerarî bigêrê. Na çarçewe de ma  kesê ke Korona ver merdî rê hûmayî ra rehmet û nêweşan rê şîfa wazenê.''