MLKP Kurdistanî derheqê Bayram Namaz o ke Rojawan de şehîd bîyo eşkerayîye daye û da zanayene, ”Terzê rêxistinbîyayîş û xebatî, têkoşînê polîtîkî reyde kerd yew. Her ca de şîyarê Kurdistano azad berz kerd.”
MLKP Kurdistanî derheqê Bayram Namaz o ke Rojawan de bi sûîqestêk şehîd kewt eşkerayîye daye.
Eşkerayîye de ame vatene, “Hemra Bayram Namaz (Baran Serhat) şodirê 23'ê Adare de hetê çeteyanê Tirkî ra bajarê Serêkanîye yê Rojawanî de nêtîceyê sûîqestêk de şehîd kewt. Sey her timî serê şodir de wexto ke serê wezîfeyê xo yê şorişgêrî de bi, bombaya ke wesayîtê ey de amebi cakerdene ameye teqnayene. Netîceyê teqayîşî de hemra Baran şehîd kewt, hemrayê leyê ey zî bi birîndar.”
Eşkerayîye de dîya vîrardene ke Baran Serhat endamê Komîteya Merkezî û Komîteya Kurdistanî ya partîya înan bi û ame vatêne, “Hemra Baran Serhat kadroyanê serkêşan ra yew ê partîya ma MLKP’yî bi. Coka hêrişo ke vera ey ameyo kerdene hêrişêko normal nîyo. No hêriş dewamê komkiştişê Pirsûsî yo ke seba rijnayîşê pirdê şorişê yewbîyayîşî yê Tirkîya û Kurdistanî ameyo viraştene. Partîya ma wexto ke Şorişê Rojawanî dest pêkerd cepheyan ê tewr verênan de ca girewt. Kobanê ra heta Reqa, Minbîc ra heta Efrînî her cephe de vera çeteyanê Tirkî şer kerd, Rojawan û Vakurê Sûrîye de rolêko muhîm kay kerd. Hemra Baran Serhat, bi hişê xo, ked, heskerdiş û coşê xo yê şorişgerî seba serkewtişê Şorişê Rojawanî xebetîya. Her cephe de ca girewt. Tewrê xebatê awankerdişê Tabûrê Azadîye yê Enternasyonalî bi. Hewrayê ma Baran awankerdiş û averberdişê Têgêrayîşê Şorişgêrî yê Yewbîyayeyî yê Şaran (HBDH) de zî ca girewt û seba caardişê qeraranê HBDH’yî bi vatiş û pratîkê xo cehd kerdo. Şima nêeşkenê ma verê ma bigîrê. Ma do Şorişê Rojawanî her tim bipawê û awan bikerê. Ma do rejîmê faşîst ê kolonyalîstan birijnê. Ma do Kurdistanî azad bikerê.”
