Zanîngehê Nagasakî ra profesorê felsefe yê japonî Motanao Moriyî destpêkê temmuze de Hamburg de bibi meymanê TATORT Kurdistan Cafeyî û qala Rojawanî kerdbî. Monotao Moriyî derheqê Konfederalîzmê Demokratîkî û Jioneolojî de ANFyî rê qisey kerd.

Monotao Moriyî da zanayene ke ey embazanê xo ra nameyê Rojawanî eşnawito û ey verê xo dayo Rojawanî. Monotao Moriyî vat: ''Rojawan de awanîya xosere û dînamîkan zaf bala mi ante. Reyna rewşa cinîyan ê Rojawanî zî zaf balkêş bîye. Japonya na babete de zaf apey menda. Japonya de hayîya merdiman zaf pê Rojawanî çin a.

La mumkîn o ke merdim fikranê Abdullah Ocalanî Japonya de bido şinasnayene û vila bikero. Sey anarşîstêkî ez fikrê konfederalîzmî hetê komelkî ra sey fikrêkê îdalî vînena. Mi bi taybetî çarçewa fikranê paradîgmaya ekolojî yê Ocalanî de ekolojîya JAponya ser o cigêrayîşî kerdî. Çunke cografyaya Japonya cografyaya afetan a. Naye ra bi perspektîf û estbîyayîşê nê fîkrî merdim eşkeno sîstemê Ocalanî seba Japonya zî bifikîro û eşkeno paradîgmaya Ocalanî Japonya ra vila bikero. Nika Japonya de rewşa cinîyan rewşêka cidî ya. Cinîyê Japonya tim binê teda, zorbazîya pederşahîye de  yê û mîyanê komelî de rolê cinîyan kêmîyayê. Coka ez Japonya de vilabîyayîşê Jineolojî zî zaf girîng vînena.''

Moriyî bale ante fîlozofanê anarşîstan ê sey Graeber û Bookchînî ser û pare kerd ke mabênê înan û Ocalanî de cîyatîya winayêne est a ke Ocalan têdûştîya cînsîye kerda meseleya verêne. Moriyî vat: ''Ocalan vano heta ke cinîyî azad nêbê komel zî azad nêbeno. Mi kitabê xo yê neweyî de bi taybetî nê çîyî ser o nuşt. Kitab de mi qala YPJ û Jineolojî kerde.''