Dostanê şarê kurdî 10ê teşrîna verên a 2023yî de sey temsîlê serranê Rayberê Şarê Kurdî Abdullah Ocalanî 74 merkezan de  hemleya “Abdullah Ocalanî rê azadîye û meseleya kurdan rê çareserîya sîyasîye” daye destpêkerdene. Endamê Înîsîyatîfê Abdullah Ocalanî rê Azadîye yê Sûrîye Ferzende Munzurî derheqê xebatanê hemle yê Rojawanî de ANFyî rê qisey kerd.

Ferzende Munzurî bale ante muhîmîya hemle ser û vat, “Ma sey înîsîyatîfî cade wayîrê hemle vejîyayî.  Bi destpêkerdişê hemle herême de xeylêk çalakîyî ameyî kerdene. Dêrikî ra heta Şehba, Kobanê waranê ke ameyî xelisnayene hemle vila bîye. Şam û Heleb de çalakîyî ameyî kerdene. Dezgehê komelê sîvîlî, partîyê sîyasîyî û şarî ra eşkerayîye paştdayîşî ameyî. Hema hema pêro bajaran de rayraşîyayîş û çalakîyê xeyme ameyî kerdene. Dewan û bajaran de bi panel û semîneran paradîgmaya Rayber Apoyî resaye şaran, muneqeşeyî ameyî kerdene.  Têna çalakîyî qîm nêkenê ganî ma bi fikîrê xo mîyanê çalakîyan de bê. Ganî her dezgeh û sazgeh, her keye de paradîgmaya Rayber Apoyî bêro înşakerdene. ”

Munzurî vist vîrî ke 2 mîlyon û 646 hezar û 211 îmzayê ke Rojawan de semedê azadîya Rayberê Şarê Kurdî Abdullah Ocalanî ameyî arêdayene, CPT û Komîserîya Berze ya Heqanê Merdiman ê Neteweyanê Yewbîyayeyan (OHCHR) rê ameyî teslîmkerdene û vat, “Rojawan de no çîyêko verên bi. Ma pêvînayîşê bi nê dezehan de dî ke ê zî têkoşînê semedê azadîya Rayber Apoyî û çareserkerdişê meseleya kurdan heqdar vînenê la çi heyf ke heta nika hema gamêka pozîtîfe nêeşta. 

Munzurî  bale ante çalakîyanê ke çarçewaya hemle de Rojawan de yenê kerdene ser û vat, “Ganî rayîr û metodê têkoşînî bêrê zengînkerdene. Ganî fikîr û felsefeya Rayber Apoyî her ca de bêrê vilakerdene. Têna bi vilakerdişî zî memanê, ganî cuye de bêrê caardene.  Rojawan de derheqê tecrîdê serê Rayber Apoyî û rewşa ey de bi tewrbîyayîşê huqûqnas, roşnvîr û nuştoxan konferansêk do bêro kerdene. Bi îmzayanê huqûqnasan do mektubêk Rêxistina Efû ya Mîyanneteweyîye rê bêro şawitene. Reyna seba ke heme dezgeh û sazgehê dinya wezîfe û berpirsîyarîya xo bîyarî ca, do vengdayîşê ma zî dewam bikerê.”