Tedayê vera ziwanê kurdkî her ke şinê zêdîyenê. Kurdkî zîndanan de bena babeta cipersayîşî û yena çinkerdene û terorîzekerdene. Çapemenîya Tirkîya de zî kurdkî bena hedefê nefretî. Mamostayêka Enstîtuyê Kurdkî yê Îstanbulî Aysele Tabak derheqê xebatanê xo û ziwanê kurdkî de Jinnewsî rê tay ercnayîşî kerdî.

Aysele dîyar kerd ke wextê pandemî de enstîtuyî dersê onlineyî dayî û vat: "1ê teşrîna verêne de do dersê ma yê têrîyî dest pêbikerê. Xebatê ma tena dersî nîyê. Weşanê ma estê, kitab, kovarê ma estê. Nika kitabê Heciyê Cindî estê, sewîyeyê çapkerdişî de yê. Ma Hînkerê xo zî newe kerdî. Ma semînerê onlîne kerdî. Semedê kurdkî eleqeyêko pîl esto. Ma muracatê onlîne akerdî û rojêke de hezarî ra zêdêr kesan muracat kerd. La wexto ke dersî dest pêkenê, hûmare eşkena kêm biba.  

Kurdkî semedo ke dersa weçînîte ya, însîyatîfê ci îdareyê mektebî rê mendo. Coka xeylêk mektebî kurdkî nêdanê. Wa wendekarî na babete de hişmend bibê û dersê kurdkî biweçînê. Prosesê çareserî ye de sembolîk bo zî dersê kurdkî abibîy la nika ma nêeşkenê vajê ke prosesêko winasên çin o. Tirkîya de sîyaset tesîrêkê pîlî komelî rê keno.  Hem îqtîdar hem partîyê rastgirî netewperestî û xeylêk partîyê bînî destek nêdanê kurdkî. Îqtîdar xora kurdkî terorîze keno. Ganî sîyasetê kurdan vera nê polîtîkayan xebatanê xo de ca bido kurdkî. Eşkenê eşkerayîyê xo bi kurdkî bidê, eşkenê mesaj û xebatanê xo bi kurdkî bikerê. Eke vera kurdkî teda nêbîyêne  xeberê sey ‘Semedo ke kurdî qisey kerd ame lînçkerdene’ do nêameyêne eşnawitene. Hêrişê vera kurdkî nîşaneyê teda yê. Çunke kurdkî yena terorîzekerdene.''

Aysele tewr peyîn wina vat: "Tutan reyde dadî û babîyî ganî bi kurdkî qisey bikerê. No xeylêk girîng o. Ziwanê dayîke hetê averşîyayîşê mezgî ra zî girîng o. Wa keyeyî tutanê xo reyde bi kurdkî qisey bikerê û keyeyanê înan de wa materyalê kurdkî estbê. Ganî weşanê sey sey Zarok TVyî qetî bêrê temaşekerdene."