Platformê Ziwanê Kurdkî seba beşdarîya kampanyaya îmza veng da

Platformê Ziwanê Kurdkî venga pêro kurdan da ke vera vateyê 'Tirkî ra ber pê ziwanêkê bînî perwerde nêbeno' yê Wezîrê Perwerdeyî  wa beşdarê kampanyaya îmzayan a kurdkî bibê.

Wezîrê Perwerdeyî yê Tirkîya Zîya Selçukî cewab da vernîyazê Wekîlê HDPyî yê Sêrtî Sidik Taşî. Taşî vernîyazê xo de perwerdeyê bi ziwanê dayîke ser o persêk pers kerdbi. Zîya Selçukî cewabê xo de wina vat: ''Tirkî ra ber pê ziwanêkê bînî perwerde do nêro dayene.''

Platformê Ziwanê Kurdkî vera nê cewabî nêrazîbîyayîşê xo mojna û venga her kesî da ke vera vateyanê Selçukî bi xurtî beşdarê kampanyaya îmzayan a kurdkî bibo.

Platformî da zanayene ke ewro xeylêk dbistan, lîse û zanîngehan de bi kurdkî perwerde yeno dayene û vat: ''Wezîrê Perwerdeyî ney nêzaneno? No ziwan ziwanê dayîk nîyo? Têna tirkî ziwanê dayîke ya? Merdimê sey Zîya Selçuko ke profesorê perwerdeyî yo ganî meseleyê merdiman çareser bikerdêne têdûştî û demokrasî bipawitêne. Heta nika selhîyetdaranê dewlete kurdan rê çareserîyêke pêşkêş nêkerde. Ganî ma pê pêro hêzê xo tewrê kampanyaya îmzayan bibê û statuyê xo pê îmzayanê xo eşkera bikerê. Wa bizanîyo ke kurdî seba kurdkî statuyêkê fermî wazenê. Wa her kes bizano ke kurdkî estbîyayîşê ma yo.''