Sazgeh û dezgehanê kurdkî seba ke qedexeyê vera kurdî wedarîyê û heqê ziwanê dayîke bêro caardene kampanyaya îmzayan daye destpêkerdene. Hemserekê HDPyî Mîthat Sancarî Amed de eşkerayîya hempare ya Platformê Ziwanê Kurdkî de qisey kerd.

Sancarî ard ziwan ke asîmîlasyonê dewleta tirke dewam keno û vera naye xîretê kurdan zî qet nêvindertî. Sancarî pare kerd ke Ziwan nasnameyê merdiman o û eke ziwanêk bi hawayêkê fermî nêşinasîyo do çin bibo û nêeşkeno xo bipawo.

Sancarî vat: ''Ewro vera kurdkî tehlukeyêko pîl esto. Ganî kudkî qanûnê bingeyî de bêra qebulkerdene. Ganî domanê kurdî zanîngeh û mekteban de ziwanê xo bimusê. No heqêko esas û meşrû yo. Eke cayêk de qedexe esto tede xoverdayîş zî esto. Coka ez nê xîretanê şima yê seba kurdkî selam kena û fîraz kena. Waştişê şima waştişê ma yo. Wa kurdkî biba ziwano fermî. Ez têkoşînê kurdkî de her kesî rê serkewtiş wazena. Ma sey HDP qey kurdkî amade yê. Înşalah ma pîya do ser bikewê. Ez zaf kêfweş a ke tewra nê kombîyayîşî bîya. Sipas û serkewtiş.''

Reyna serekanê partîyanê sîyasîyan û dezgehanê bînan zî balê ante muhîmîya kurdkî û yewîya neteweyîye ser.

Serekê Pêroyî yê Partîya Azadîye ya Kurdîstanî  (PAK) Osman Ozçelîkî vat: ''Na kampanyaya zaf muhîma. Ganî  heme partîyê sîyasîyî û dezgehê komelê sîvîlî bêşertî paştî bidê ke ma vengê dinya rê bidê eşnawitene. Ma wayîrê ziwanê xo vejîyê ke wa tornê kurdan zî ziwanê xo qisey bikerê.''

Serekê Pêroyî yê Partîya Sosyalîste ya Kurdîstanî  (PSK) Bayram Bozyelî vat: ''Ziwan hêzo demokratîk û meşrû yê merdimî yo. Ma xebata ziwanî biaçarnê xebata yewîye ke wa kurdkî bibo ziwanê perwerdeyî.''

Vervatoxê Têgêrayîşê Azadî Ayattulah Aşitî vat: ''Bimbarekîya ziwanê dayîke Kurdan-i Kerîm de ca gena. Dînê îslamî dînê perwerdeyî yo. Qedexekerdişê kurdkî zulum o. Êyê ke wayîrê bawerîya îslamî yê ganî vera nayî vejîye.''

Serekê Platformê Kurdanê Demokratan-Bakur  (PDK-Bakûr) Sertaç Bucakî  vat: ''Badê ronayîşê Komere ya Tirkîya ame waştene ke kurdkî bi sîyaset û asîmîlasyonî bêro qedînayene. Na kampanya zaf muhîm a. Ma hêvî kenê ke semedê yewîya neteweyîye zî bibo gamêke.''

Serekê Pêroyî yê Partîya Merdimî û Azadîye (PÎA) Mehmet Kamaçî vat: ''Ziwan halînê estbîyayîşî yo. Eke ziwanê yew netewe werte ra wedarîyo a netewe çîn bena. Xebatê derheqê ziwanî bimbarek ê. Ma semedê kurdkî destûr nêwazenê. Ma vanê wa qedexe bêro wedaritene.''

Serekê Pêroyî yê Partîya Komunîste ya Kurdan (KKP) Sînan Çîftyurekî vat: ''Dewleta tirke seba ke kurdan werte ra wedaro ziwan û kulturî asîmîle kena. Yewîya seba ziwanî mîrazê yewîya Kurdîstanî yo. Ganî bi mîlyonan kesan şirê dewlete ser.''