Endama Komîteya Zîndanan a PAJKî Nejbîre Sîîrt Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' û grevê vêşanîye yê tepişteyan ANFyî rê ercnayî.

Qiseykerdişê Nejbîre Sîîrt ra tay noqtayê girîngî wina yê:

''Rayber Apoyî ra 33 mengî yo xeberêke çin a. No tecrîdê Îmraliyî teyna 33 mengî ney 1999 ra nata yeno caardene. Teyna dewleta tirke ney hêzê mîyanneteweyîyî tecrîdê Îmraliyî ferz kenê. Nê wextî de Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dîyaye destpêkerdene. Na hemle hemleya azadbîyayîşê kurdan a. Ewro tecrîd vilayê pêro zîndanan bîyo. Vera tepişteyan kerdişê bêexlaqî est ê. Dewleta tirke seba ke meseleya kurdan çareser nêba tecrîdî ana ca. Eke tecrîd bêro wedaritene Rayber Apo eşkeno meseleya kurdan cade çareser bikero. Eke meseleya kurdan bêra çareserkerdene meseleyê sîyasî, ekonomîkî ûsn. ê Tirkîya zî do çareser bibê.

Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dinya ra destek dî. Na hemle hemleyêka global a ke 74 merkezan de heman wextî de îlan bîya. Xêrê na hemle ra tecrîd û îşkenceyê Îmraliyî û faşîzmê dewleta tirke teşhîr benê. Zaf girîng a ke her kes tewrê na hemle bibo.

Xoverdayîşê Îmraliyî yê Rayber Apoyî û xoverdayîşê pêro tepişteyan mewzîyanê têkoşînî yê PKKyî ra yê. Ewro zîndanan de kerdişê Darbeya 12ê Êlule yenê caardene. Zîndanan de tepişteyî yenê qirkerdene, îşkence vînenê. Tewr peyên embazê ma Cemal Tanhan şehîd bibi. La embazê ma tepişteyî rixmê teda û îşkenceyan zî xo ver danê. 27ê teşrîna peyêne de embazanê ma vera tecrîdê Îmraliyî û seba çareserîya meseleya kurdan dest pê grevê vêşanîye kerdbi. Embazê ma yê tepişteyî sey her wextî serkêşîya xoverdayîşî kenê û ruhêkê fedayîyî mojnenê.

Ancî Nobetê Edaletî hetêkî ra yenê kerdene. Aseno ke no xoverdayîş do dergûdila bibo. Şarê ma ancî vera dişmenî kişta haştîye de cagêno. Ez nê nobetanê edaletî zerrî ra selam kena. Şarê ma ronîyayîşê PKKyî ra nata tim bi rêxistin û têkoşînê xo ser kewt. No ruhê şarê ma do peynî de tecrîdê Îmraliyî bişikno û Rayber Apoyî azad bikero.

Seba ke grevê vêşanîye yê zîndanan ser bikewo ganî teber de her kes paştî bido tepişteyan û xoverdayîşê embazanê ma yê tepişteyan pîlêr bikero. Ganî pêro şarê ma bibo vengê tepişteyan. Bi taybetî cinî û ciwanî wa erkê xo yê serkêşîye nê prosesî de bîyarê ca. Ez venga pêro welatperweran dana ke wa bi xurtî wayîrê grevê vêşanîye vejîyê. Têkoşînê ma yo rêxistinkerde eşkeno peynîya polîtîkayanê faşîstan bîyaro. Hêzê ma est o ke ma azadîya Rayber Apoyî bîyarê ca û meseleya kurdan rê zemînê çareserîye awan bikerê. Eke ma bi nê hawayî nêzdîyê prosesî bibê azadîye û serfîrazîye do bêra.''