Nêweşîya Korona vilabîyayîş û tehdîtkerdişê dinya rê dewam kena. Hetê bînî ra vera Korona tedbîrî yenê girewtene.

Goreyê Ajansê Reutersî Namibya û Ruanda de zî nêweşîya Korona ameye tesbîtkerdene. 57 hemwelatîyê tirke yê ke Begdadî ra şiyênî Anqara nêweşxane de gerîyayî binê çimdarî. Yenî Zelanda qerar girewt ke hemwelatîyê înan zî tede kesê ke teberê welatî ra yenê do 2 hewteyî bigerê binê karantîna.

Fonê Hetkarîya Domanan ê Neteweyanê Yewbîyayeyan (UNICEF) da pêhesnayene ke  îmkanê heme kesan çîn ê ke destanê xo bişuyê. Pêroyê dinya de  êyê ke nê îmkanê înan estê têna se ra 60 ê. Goreyê naye keyeyê 3 mîlyar kesan ke îmkanê destşutişî çîn o. Reyna se ra 47 mekteban de semedê destşutişî lavabo çîn o. No zî 900 mîlyon domanan ser o tesîr keno. Merkezanê weşîye de zî se ra 16ine de  tuwalet û lavabo çîn ê. UNICEFî da zanayene ke rîskê Korona tewr zaf  neçaran ser o do tesîr bikero.

Neteweyê Yewbîyayeyî (NY) da zanayene ke ê rîyê nêweşîya Korona ra roja dişemeyî ra tepîya do 3 hezar persenolê înan keye de bixewtîyê. Berpirsîyarê Apple Tim Cookî zî da pehesnayene ke teberê Çînî de heme welatan de dikananê xo heta 27ê adare qefilnenê.