Hemvervatoxa Komîteya Karanê Teberî yê YNKyî Nilufere Koç derheqê netîceyanê Pêkerdişê Lozanî de qisey kerd.

Nilufere Koç Pêkerdişê Lozanî sey qirkerdişê fîzîkî û kulturkî yê vera kurdan name kerd û vat, “Yeno waştene ke kulturê kurdan qoqê ci ra bêro wişkkerdene. Coka vera cinîyan polîtîkayê taybetî yenê averberdene. Kurdîstan de qirkerdişê cinîyan qewimîya. Reyna qirkerdişê xoza ame kerdene. Bi Pêkerdişê Lozanî estbîyayîşê şarêkî bi problemkerdene. Pêkerdişê Lozanî serewedaritişanê kurdan zî ano vîr. Eke heta ewro nêeşkayî ma biqêdînê no xeyrê têkoşînê kurdan ra yo ke bêmabên yeno dayene. Rayberanê ma yê girdan vatbi ‘tornê ma do qesasê ma bîgêrê.‘ Ewro tornê înano tewr girdî Rayber Apoyî bi mîlyonan cinî û camêrdê kurdan ê fedayî afirnayî ke nê têkoşînî rayra benê.

Têgêrayîşê Cinîyan ê Kurdan eke şorişo gird kerdo no pê mîrasê têkoşînê ke ma dayîkanê xo ra girewto bi. Tewr sere de cinîyî nasnameyê kurdan pawenê.  Ma zî sey Komîsyonê Cinîyan ê KNKyî cehd kenê ke xeylêk cinîyan tewrê konferansî bikerê. Cinîyî derheqê Lozanî de senî fîkiryenê? Naye ra pey do mîrasê ma yê têkoşînî senî bo? Munaqeşeyê winayênî do bêrê kerdene. Rayber Apoyî serkêşîya cinîyan de kulturêko demokratîk afirna û qismêko pîl ê Lozanî betal kerd.

Ma do heta êlule semedê Lozanî çareserîyanê alternatîfan ser o muneqeşe bikerê. Heta peynîya temuze ma do probleman ser o qisey bikerê. qirkerdiş, qirkerdişê cinîyan, qirkerdişê xoza, rewşê ke Kurdîstan de qewimîyenî û rewşa şaranê bînan ma do muneqeşe bikerê. Êlule de ma do Lozan de pîya bi xeylêk dezgehanê komelê sîvlî  û hetanê sîyasîyan do rojî derheqê çareserî de muneqeşe bikerê. Ma verê Pêkerdişê Lozanî de çok nêda. Çareserîya ma est a.  Ma serê Kurdîstanî ra herêma Rojhilatê Mîyanênî de newe ra hêvî afirna. Ma do bi pêramotiş, ramojnayîşê fîlman û muneqeşeyanê sîyasîyan ramojnê ke ma senî çareserî afirnaya.“