Keyeyê Şenyaşarî yo ke 3 ferdê ci hetê merdimanê Wekîlê AKPyî Îbrahîm Halîl Yildizî ra kişîyayî, 100 rojî yo nobeta edaletî de yo. Dadîye Emîne Şenyaşar qerardar a ke heta caardişê edaletî xoverdayîşê xo rê dewam bikera.
Emîne Şenyaşar û Haci Esvet Şenyaşar 1976 de zewijîyayî û bîyî wayîrê 7 domanan. 1990 de keyeyî sebebê madîyî ra koçê merkezê Pirsûsî yê Riha kerd. Şenyaşarî Pirsûs de pê welatperwerîya xo şinasîyayêne. Keyeyî 2014 de wextê hêrişanê DAÎŞî de keyeyê kobanêyîjî kerdî meyman.
Keyeyê Şenyaşarî 40 serrî yo qezaya Pirsûsî ya Riha de esnafîye kerdêne. 14ê hezîrana 2018î de keye pê fermanê Wekîlê AKPyî Halîl Îbrahîm Yildizî rastê qirkerdişî ame. Yildiz a roje seba karê weçînayîşî dekeweno dikana Şenyaşaran û vano waştişê înan esto yan çin o. Keyeyê Şenyaşarî zî vano 'Merdimê xo şîyar bikerê, roniştoxan ecîz kenê, qiseyan erzenê kêna û cinîyan.' Naye ser o Yildiz wexto ke dikane ra vejîyeno nîşan dano û merdimê ey hêrişê keyeyê İŞenyaşarî keno. Hêriş de Adil, Mûhammed, Mehmet, Ferît û Celal Şenyaşar birîndar benê û wedarîyenê nêweşxane. La merdimê Yildizî nêweşxane de zî hêrişê keyeyê Şenyaşarî kenê.
Babî Haci Esvet û dadîye Emîne Şenyaşar şinê Nêweşxaneyê Dewlete yê Pirsûsî. Merdimê Yildizî nêweşxane de pê kardan hêrişê Emîne û Esvet Şenyaşarî kenê. Babî Esvet Şenyaşar nêweşxane de yeno kiştene.
Hêriş de Celal, Adîl û Esvet Şenyaşar yenê qetilkerdene. Fadil Şenyaşar zî 17ê hezîrane de pê sûcdarîya cînayetî tepişîyeno û erşawîyeno Zîndanê Xarpêtî. Fadil Şenyaşar hucreyê yewkesî de maneno.
27ê kanûna 2019î de derheqê dewa de îdîaname ame amadekerdene. Nê mabênî de dîmenê Nêweşxaneyê Pirsûsî ameyî pakîkerdene. 15ê nîsana 2020î de roniştişo verên ê Fadil Şenyaşarî ame kerdene. Avûkatan ard ziwan ke îdîaname de ca nêdîya hêrişê nêweşxaneyî û waşt ke Fadil bêro veradayene.
Roniştiş de dadî Emîne Şenyaşar wina qisey kerdbi: ''Mi xebera hêrişî girewte. Wexto ke ez şîyêne dikane cinîyanê taxa ma mi rê vat eke ez şora ê do mi zî bikişê. Polîsan dormeyê dikane girewtbi, nêverda ez şora zere. Wexto ke ma şîyî nêweşxane Heci verê çimanê mi de kişîya. Ez nêeşka domananê xo zî bivîna.''
Roniştişê 3. de wekîlê HDPyî û rojnamegerî nêameyî girewtene zereyê salone. Mutala de seba Fadil Şenyaşarî cezaya zîndanî ya 150 serran ameye waştene. Seba Enver Yildizî cezaya zîndanî ya 12 serran ameye waştene.
Roniştişê 4. de 25ê çeleyî de dormeyê edlîye ame girewtene. Emîne Şenyaşar, Ferît Şenyaşar û tay ferdê keyeyê Şenyaşarî tewrê roniştişî bîyî. Roniştiş de îfadeyanê nakokan ê şahîdanê keyeyê Yildizî xeylêk bale ante. Rixmê ney zî semedê Fadil Şenyaşarî bira dewamê rewşa tepiştetîye dîyaye.
Roniştişê 12ê adare de şahîd Murat Kayayî qisey kerd. Keyeyê Yildizî îdîa kerdbi ke Şenyaşaran dikane de înan rê vato 'Ti zanenî ma kam ê? Ma rêxistine ra yê.' Şahîd Kayayî pare kerd ke Şenyaşaran çîyo winasên nêvat. Avûkatan ney ser o waşt ke wa Fadil Şenyaşar bêro veradayene. Avûkatan waşt ke qeydê tape yê Îbrahîm Yildizî bêrê goşdarîkerdene, tehqîqat bêro hîrakerdene, delîlê serebûtî bêrê tesbîtkerdene. La mehkeme nê waştişî red kerdî û dewa taloqê 2ê nîsana 2021î kerde.
2ê nîsane de roniştişê bire de mehkemeya tirke bi îdîaya kiştişê Mehmet Şah Yildizî, xîretê kiştişê Abdurranman Yildiz, Nîhat Yildiz, Mustafa Yildiz, Sukeyman Yildiz, Kenan Yildizî û birîndarkerdişê Ahmet Çetîn û Engîn Şîmşekî cezaya zîndanî ya 37 serran û 9 mengan daye Fadil Şenyaşarî. Mehkeme têna cezaya zîndanî ya 18 serran daye Enver Yildizî. Avûkatan da zanayene ke ê do bire berê mehkemeya îstîsnafî.
Keyeyê Şenyaşarî roja mutalaya dozgerê dewa ra nata verê Edlîyeya Riha de nobeta edaletî kenê. Dadî Emîne Şenyaşar û Ferît Şenyaşar 100 rojî yo gêrenê edaletî. Nê 100 rojan de wirdî zî çend reyî ameyî destbendkerdene, maruzê îşkenceyî mendî.Emîne Şenyaşar hêsiran û stresî ra hele mende ke çimanê xo vînî bikera. Dadî Emîne Şenyaşar ana ziwan ke heta ke edalet bêro caardene ê do têkoşînê xo rê dewam bikerê.
