Merdim û dayîkê tepişteyan seba ke bibê vengê domananê xo yê ke grevê vêşanîye û rojeyê mergî  de yê, 9’ê Nîsane ra nata vernîya Hepisxaneyê Gebze yê Tîpê M’yî de “Nobeta Çalakîye” virazenê. Keyeyê tepişteyan semedê astengkerdişî polîsan banê Rêxistina HDP’yî ya Gebze de çalakîya xo ya nobete dewam kenê. Xeylî hemwelatijî û avûkatanê Komeleya Huqûnasanê Azadan (OHD) paştdayîş da keyeyan.

Heta tecrîd nêro wedaritene ma do dewam bikerê

Dayîka Newroz Bozkûrt a ke 1’ê Adare ra nata Hepisxaneyê Gebze de grevê vêşanîye de ya Sûltan Bozkûrte, çalakîya nobete de qisey kerd û wina vat, “Bi her hawayî ma bi hêz û bi moral ê. Her ca de çalakîyî dewam kenê. Ma paweyê ke eşkerayîye bêra dayene. Heta ke tecrîd nêro wedaritene ma do çalakîya xo dewam bikerê. Ma heta peynîye peyê waştişanê xo de yê. Waştişê domananê ma waştişê ma yê. Eke grevê vêşanîye biqedîyo zî, ma do nêweşxaneyan de û her ca de leyê domanê xo de bibê. Ma dest têkoşînî ra nêverdanê.”

Eşkerayîye ra dima keyeyan dest bi çalakîya roniştişî kerd û ê do çalakîya xo heta saetanê şewe dewam bikerê.