Nisebîn de kesê ke roja 47'ine ya Nobeta Demokrasîyî de kom bîyî, tayînkerdişê qeyûman îermezar kerd. Parlamentere Ebru Gunaye çalakîye de qisey kerd û vat: "Beno ke şima ma çin hesibnenê. Şima qet nêeşkenê ma qels bikê. Mêrdîn û qezayanê ey weçînayîşê herêmî yê 31'ê Adare de reya xo daye HDP. La hukmatê AKP'yî îradeyê Kurdî xesp kerd. 47 rojan ra nata xîret kenê ke pê qeyûman nê şaristanî îdare bikê. La qeyûm îdare nêkeno, xesp keno. Qeyûm zî sey faşîzmê AKP-MHP'yî îradeyê cinîyan nas nêkeno. Bi nê hewayî hêrişê destkewteyanê cinîyan keno. "

Gunaye bale ante dewaya tacîzkarî Ercan Uysaler zî û qiseykerdişê xo rê wina dewam kerd: "Vizêr mehkemeya Ercan Uysaler o tacîzkarî bî. Ma waşt ma verba naye şêrê, la destûr nêda rayraşîyayîşê ma. Ma na dewa ra fek vera nêdanê. Şima qet nêeşkenî ma qels bikê. Ma do têkoşînê xo yê demokrasîyî rê dewam bikê. Ma veng danê ke wa her kes dormeyê HDP'yî de bêrê têhet."