Nobeta Strasbourgî hetê koma Hollanda ra ameye dewrgirewtene
Çalakîya nobete ya ke şaristanê Strasbourgî yê Fransa de seba azadîya Rayberê Şarê Kurdî Abdullah Ocalanî yena kerdene, Hetê koma Hollanda ra ameye dewrgirewtene.
Nobeta Azadîye ya ke 25ê hezîrana 2012î ra nata şaristanê Strasbourgî yê Fransa de, seba azadîya Rayberê Şarê Kurdî Abdullah Ocalanî yena kerdene, hewteyê 597. de bi koma newî dewam kena.
Dr. Azad Badiki, Nazir Aranacak û Cemil Urek ê ke Den Haagê Hollanda ra ameyî, nobete no hewte dewr girewte.
Azad Badikiyî ke derheqê nobete de eşkerayîye daye bi nameyê şarê welatperwerî yê Hollanda Rayberê Şarê Kurdî Abdullah Ocalan selam kerd û vat azadîya ey azadîya şarê kurdî ya.
Azad Badikiyî vera bêvengîya dezgehanê eleqedaran ê Ewropa nêrazîbîyayîş mojna û veng da ke wa wezîfeyê xo bîyarî ca. Badikiyî kurdan ra zî waşt ke wa zefêr tewrê çalakîyan bibê û vat heta ke Abdullah Ocalan azad nêbo şarê kurdî azad nêbeno.
