NYT : DYE plan keno ke vera Îranî 120 hezar eskeran bişawo

Goreyê rojnameyê New York Timesî (NYT), rayberîya Washîngtonî plan kena ke vera Îranî 120 hezar eskeranê xo bişawo Rojakewtena Mîyanêne.

Goreyê xebera NYT’yî, ke xebera xo selahîyetdarêkê rayberîya Washîngtonî ra girewte û nameyê ey eşkera nêkerd, wekîlê Wezîrê Pawitişî Patrîck Shanahanî, roja Panşeme kombîyayîşêk de şêwirmendanê bingeyênî yê asayîşî yê Trumpî rê planêkê vera Îranî pêşkêş kerd.

Rojnameyî da zanayene, goreyê planî; eke Îran hêriş bi hêzanê Amerîka bikero, yan zî xebatanê xo yê seba çeka nukleerî zêde bikero, ganî nêzdîyê 120 hezar eskerî seba Rojakewtena Mîyanêne do bêrê şawitene.

NYT’yî eşkera kerd ke, xeylî planî yenê etudkerdene û şawitişê eskeran beno ke bi hewteyan heta bi mengan do dewam bikero.

Qesra Sipîye derheqê babete de eşkerayîyêk nêdaye. Pentagonî zî xebere şîrove nêkerde.

Alozîya mîyanê DYE û Îranî hewteyê peyênî de zêde bîye. Peymana nukleerî ra xo apey antişê DYE ra serrêk tepîya, Îranî zî eşkera kerd ke ê tayê sozanê xo yê ke derheqê babete dayê wedaritê.