Rayberê Şarê Kurdî Abdullah Ocalanî sîstemê Îmraliyî zî sey perçeyêkê Komploya Mîyanneteweyîye vîneno. Ûca tena sey zîndanêk nê sey cayo ke modernîteya kapîtalîste şexsê ci de şarê Kurdî û şarê herême xo rê hedef girewto vîneno. Ocalan nûşteyan û pêvînayîşanê xo de nê sîstemî tehlîl keno, senî mucadeleyêkê pîlî hemverê nê sîstemî de dano îfade keno. 

Kitabê Ocalanî yê bi nameyê ‘PAWITIŞÊ MHMEYÎ – DEWLETA SUMERE YA RAHIBAN RA VER BI KOMARA ŞARÎ’ de prosesê komploye û rastîya Îmraliyî bi eşkerayî arîyeno verê çiman. Ma sey qisman pare kenê:

Şertê muhakemekerdişî yê Îmraliyî, waştişê vernîgirewtişê şidetî û komplokaran rê nêdayîşê firsendî bisînor bo zî ma rê ferz kerdêne ke ma seba virazîyayîşê atmosferê aşitî cehd bikerê. Nizdbîyayîşo tewr pratîk no bi ke pawitişê ke ameyî kerdene bingeyê aşitî û yewîya demokratîke de bîyî. Nê şertan de atmosferê lînçê sîyasîyî serdest bî, ganî nêro vîrakerdene. Ez vana qey dormeyê Tirkîya yê aqlîselîmî û selahîyetdarî ê şertan de nêeşkayêne mentiqê komploye fam bikerê û seba nê hadre nêbî.

ŞOVENÎZMO KE RESABI DERECEYA HÎSTERÎYE RÊ PAKÊTE

Komplo bi pêşkêşkerdişê pakêtêka hewa ra eslê xo de kayê Roma yê arena de werdişê bi şêrî yê formê seserra 20ine hadre kerdibi. Tîya de ameyêne waştene ke atmosferêkê şidetî ke heme amacanê PKKyî ra zî wetêr o bêro viraştene. Çi heyf o ke heme hêzê ke hemverê yewbînan de bî hêrişanê xokiştişan ê hemverê yewbînan sey heqê xo yê meşrû zanayêne. Çîyo hîna xirab zî hetî famkerdişê nê kayî ra dûrî bî. 

HER ÇÎ GOREYÊ MERGÎ AMEBI EYARKERDENE

Eslê xo de her çî goreyê mergî amebi eyarkerdene. Bi giranî waştêne ke fîzîkî eke no mebo bi mana mi biqedînê. Ez texmîn nêkena ke bê nê hedefêk bibo. Komplo hende xorî bîye û bi nêzanayîşan pir bîye ke seba binfînayîşê ci vejîyayîşêkê merdimîye yo zaf aver lazim bi.

Komplo wina amîbî dîzaynkerdene ke êyê ke tewr nizdî bî û dostî bî ser o zî teberê fikrê ‘mergêko bişeref’ de çîyêk nêpawitêne. Mentiqê çaxî no bi. Mentiqê dostî zî û dişmenî zî no bi. Goreyê qaydeyêkê şerî ‘ser o gule varîyayîş’ ez do vajî, rixmo ke no sey heqêq yeno dîyene, no heq zî mi rê nêdîyayêne. Medenîyetî waştêne ke bi yewna hawayî mi ra qesas bigîro.   

DOMANO KE XEYALANÊ XO DE ÎXANET NÊKENO

Mi çirey qehremanîye rê kay nêkerd. Ez wina qaso ke yeno texmînkerdene wayîrê cesaretî nêya, ez wazena ke sey xo bêrî naskerdene la embazê min ê tewr nizdan de zî ez nê rê nêbîya şahid. La hetêk mi bi ke mi do ê rê îxanet nêkerdêne: Ez do sey domanêk ke xeyalanê xo rê îxanet nêkeno bimendêne. Mi do Homayanê medenîyetî nas nêkerdêne, sazîyanê ci de nêvilêşîyayêne û nêbîyêne camêrdê keyeyî yê cinîyanê ci. Halê mi vajê hema hema mi mehkumê Prometheuskarîya hemdeme kerdêne.   

ATÎNA, MOSKOVA, ROMA Û KENYA

Senî Prometheus Koyanê Qafqasya de mehkum bi ez zî kereyanê Îmraliyî de mehkum bîbîya. Çi heyf ke no zî hetê torinanê Homayê Athena Zeusî ra arîyabi mi serre. Moskova kayêkê nimzî seba çend mîlyaran ê ÎMFyî kay kerd û nê ra qe nerehet nêbî.

Roma de bi hesabanê barîyan ê kapîtalîzmê modernî huqûq ameyêne binpaykerdene û bi terorêkê psîkolojîkî mi ser o şerê rûmetî ameyêne ferzkerdene, mi zî çîyo ke lazim bi kerdêne. Athena zî bawerîya ke ci ra dost yeno vatene do bi hawayêkê fahîşetî bikar biardêne û mi bieşrawitêne paytextê Kenya, wareyê merdimweran. Kesê ke tewirêkê cîyayî pawenê heta rastî bi temamî hîs nêkerê nêeşkenê biresê netîceyanê fikirkî û moralî. Mi qedere ra qe bawer nêkerd. La ez do hetê hêzanê qedera ra çarmêxê seserra 20ine ya hemdeme de bêvengîya gorî de biamêyene vindertene.       

EZ DO HEMVERÊ LANETÊ MEDENÎYETÊ HEMDEMÎ DE BIN NÊKEWTÊNE

Îmrali de pawitişî efû karê mi nêyo. Çîyo winayên nêeşkeno bibo cewabê wesf û manaya cuya mi. Mi do seba aşitî îmkananê tewr bisînoran de zî cehd bikerdêne û dima ra tewirê sîyasîyî ser o bivindertêne. Ez do goreyê waştişanê rast û çepê medenîyetî tê nêgêrayêne û xo înan rê nêkerdêne alet.

Mi do her nizdbîyayîşo ke aşitîyêka birûmete rê û azadîye rê xizmet bikerdêne rê paştî bidayêne. Herinda girawanê sîyasîyan ê cîya cîyayan mi do her ‘unîterîyê’, yewîyê ke wayîrê îfadeyê azadî yê tercîh bikerdêne. Sey her wextî senî ke hemverê yewîya bizore de vindertêne, ez do hemverê cîyabîyayîşê bizorî de zî bivindertêne û peymeyê xo yê manîdarî bipawitêne.    

MA WAYÎRÊ TEWIRÊ TEWR TARÎXÎ BÎYÎ

Cewherê pawitişanê Îmraliyî no yo. Ez umîd kena ke her roja ke şina ercê ci yeno famkerdene. Eke ma eşkayê terorê serê Tirkîya yê rastekînî tayê vindarnê, menfaatê dormeyanê rantî bikerê tay û eke ma eşkayê ramojnê ke mucadeleyo sîyasî yo demokratîk hîna manîdar o, no yeno na mana ke ma bîyê wayîrê tewirêkê tewr tarîxîyî.  

Do dewam bikero....