Rayberê Şarê Kurdî Abdullah Ocalanî sîstemê Îmraliyî zî sey perçeyêkê Komploya Mîyanneteweyîye vîneno. Ûca tena sey zîndanêk nê sey cayo ke modernîteya kapîtalîste şexsê ci de şarê Kurdî û şarê herême xo rê hedef girewto vîneno. Ocalan nûşteyan û pêvînayîşanê xo de nê sîstemî tehlîl keno, senî mucadeleyêkê pîlî hemverê nê sîstemî de dano îfade keno.

Kitabê Ocalanî yê bi nameyê ‘PAWITIŞÊ MHMEYÎ – DEWLETA SUMERE YA RAHIBAN RA VER BI KOMARA ŞARÎ’ de prosesê komploye û rastîya Îmraliyî bi eşkerayî arîyenê verê çiman. Ma qismê şeşinê pare kenê:

CAYO EWILÊN KE EZ AMEYA ÇARMIXKERDENE ATÎNA YA

Cayo ke ez reya ewilêne ameya çarmixkerdene paytext Atîna ya. Atîna bi qesasêko kor û ruhêko tersanek waşt ke dejê vînkerdişê serdestîya xo ya hîrê hezar serran, mi ra vejo. Gama ke înan vîna ke no mumkun nîyo, ti vanî qey ê wayîrê mi yê, vera tayî tawîzanê Kibris û Egeyî ez sey paketêkê dîyarîye daya hukmatê Tirkî. Îxaneto wînayên tarîxî de çîn o. Atîna sey endamê Yewîya Ewropa vera Peymannameya Heqanê Merdiman a Ewropa (PHME) sucê huqûqî kerdo.

BI MÎLYONAN KURDAN RÊ AME BICAARDENE

Nuştoxo Yunan Kazacakî romanê ‘Newe ra kewtişê çarmixa yê Îsayî‘ rewna nuşto. La rewşa mi cîya ya. Bi mîlyonan Kurdê bi îradeyê azadî yê ke Rayberîya xo rê giredayeyî, nê hemeyan rê çalakîya çarmixa ameya bicaardene. Yunanî wextê Zeûsî ra xo zaf qurnaz hesibnenî. Serranê 2000î de ez ginaya dame rê. Eke înan mi bikiştayêne xeymê mi de nêbîyêne. La ê senî cesaret kenî ke bi usûlê paketkerdişî ke cayê ci kitabê merdimîye de çîn o û goreyê qeydanê ehleqî nîyo, mabenê dejê 30 hezar şehîdan û hesiranê mayanê şehîdan de, gama ke ez bîna hadre nêbîya û wexto ke krîtîk de, mi teslîm tîmanê taybetî yê şerî yê tirkî bikerî? Peynîya ci de serekê Amerîka Clinton bibiyo. Ey ferman dayo. (Şewîrmendê ci yo taybet Blinkenî no çapemenî rê eşkera kerd). O wext skandalê Monîka estbî û Clinton seba ke nê skandalî ra bixeliso şertê teslîmkerdişê mi yê MOSADî bica ardî. Seba paştîdayîşê Amerîka her çî ame kerdene. Sewbîna kesî cesaretê na komploya bêehlaqî nêkerdêne.

SEBA SERKEWTIŞÎ GANÎ SÎNORÊ EHLAQÎ BIBO

Hz. Îbrahîm pêxambero verên o ke qurbankerdişê însanî dînî ra wedarto. Ganî MOSSADî seba xatirê ey û hurmetê dînî mekewetêne çalakîya qurbunî. Seba serkewtişî ganî sinorekê ehleqî bibo. Ganî înan Kurdo sey mi, sey bombaya atomî nêşuxulnayêne. Ganî biameyêne hesabkerdene ke rojêk aqilê Kurdî do bêro sereyê ci û o do qesasgirewtiş organîze bikero. Hezar ra yew bi zî ganî no îhtîmal biameyêne hesabkerdene. Mixo ke Atîna de tabûtê mi rê ame kuwayene. Mehneyê ci yo merdimî û tarîxî na çarçewa de yo.

MIXÊ DÎYINÎ MOSKOVA DE AME KUWAYENE

Mixê dîyinî Moskava de ame kuwayene. Naye rê ez bina şaş nêbîya û hêrs nêbîya. Gerrekerdişî zî hend bi mehne nêvînena. Rusî û hukmatê înan yê ke tewr erjayanê xo rê nimz nêzdîbene û nêpawene, înan ra çîyêko biehleqî û merdimî nêpawena. Rûsan o wext eşkera ramot ke seba peran çîyêko feda nêkerî çîn o. Rûsya ke endamê Konseya Ewropa ya pabesteyê Peymannameya Heqanê Merdiman a Ewropa ya. Coka rixmo ke îltacayê mi amebi qebulkerdene, mi bi zorî Rûsya ra eştiş teberê huqûqî yo. No zî Mehkemeya Heqanê Merdiman a Ewropa (MHME) û Yewîya Ewropa (YE) eleqedar keno.

VERÊ ÇIMANÊ PAPAYÎ DE MIXÊ HÎRÊYINÎ

Paytexto miqedes ê Ewropa Roma de verê çimê Papayî de mixê hîrêyinî ame kuwayene. Ewropa û Roma îddîa kene ke ê medenîyetê dewrî temsîl kenî. Roma ganî çîyêko Saîn Paulî rê ameyo kerdene reyna mekerdêne. 66 rojî senî ke mi sey qefesa asine de tepişî dormeyê mi dê polîsî ca kerdî. Mi waştişê estbîyayîş û azadîya şarêkê tewr verên ê tarîxî yo ke hema nameyê xo zî nêdayo qebûlkerdene û qet heqêkê merdimîye yê ci nêno naskerdene ardêne ziwan. No goreyê qeydanê Ewropa heqêko demokratîk o. Nê heqî rê qet rêz nêame ramojnayene. Seba remnayîşê mi her çî ame kerdene. MHME ganî seba naye Roma ya ke şekil û ruh dayo Ewropa, ci ra hesab biperso.

KENYA TERCÎHÊ EWROPA Û AMERÎKA BI

Remnayîşê mi yê paytextê Kenya temamî de bi îradeyê hemkarî yê Amerîka û Ewropa ame kerdene. Gureyo tewr leymin yê komploye eşt Kenya ser û waşt ke bi naye xo pak ramojnê. Vanê qey Ewropa pak bîye û sucê Kenya kerd! Eşkeraya ke Ewropa şiknayişê şaran de zaf tecrube qezenc kerdo. Tîya de rolêko nimz yê celatê sîyasî dayo kaykerdene. Yanî vanê ke Ewropa de gureyo leyşin nêbeno; mîyanê merdimweran de beno!

KURDÎ Û TIRKÎ GANÎ KOMPLO BIVÎNÊ

Kenya de rolê Amerîka eşkera yo. Goreyê mi îstîxbaratê Yunanî û CIAyî na dolabê eşqê Tirkîya ra nêçarnaya. Bêşik o ke sey amecêkê stratejîk înan waşt ke mergê mi destê Tirkan ra bibo. No kayo ke her di hetan zî binê maskeyê dostîye hem Kurdan hem zî Tirkan rê kay kerdê, komployêka nimz a. Ganî Kurdî zî Tirkî zî nê hetê komplo bivînê.

STRATEJÎ YA RAŞTGIRANÊ ÎSRAÎLÎ

Îsraîl dinya de tecrîdkerdiş û teslîmkerdişê mi de rolêko eşkera kay kerdo. Vejîyayîşê mi yê Rojakewtena mîyanêne û averberdişê Têgêrayîşê Kurdî, înan hetê stratejîkî ra xo rê sey reqîp û tehlûkeyî dîyo. Îsraîl hêzanê hemkaran ê Kurd ê Iraqî esas geno. Rîyê xoser têgêrayîşê mi, cayê hemkaran tengkerdişê mi û sehaya Ereban de zaf mendişê mi ra înan derheqê mi de stratejîya xo aver berde. Ez vana qey seba Îsraîlî ez Arafatî ra zafêr nêna waştene. Îsraîl komploya 9ê Teşrîna verêne ya 1998î de dest eşt mi. Bombakerdişê 6ê Gulane ya 1996î ra xebere û paştîdayîşê înan esto. Mi Moskova ra fetinayîşê serrekkomar Primakuvî pabesteyê Îsraîl û lobîyê Yahûdîyan o. Îsraîl Amerîka ser a zore dayêne Îtalya zî. Beno ke sebebê Ewropa de nêwatişê mi MOSSAD bo. Fermanê teslîmkerdişê mi yê Amerîka zî raştîya Yahûdîyan a.

ROJAKEWTENA MÎYANÊNE DE CAYÊ ŞARÊ YAHÛDÎYAN ZÎ ESTO

Mi nê tewirê Îsraîlî tim vecîyayîş de çîyêke ardê sereyê Mûsayî û belka zî sey tewirê merdişî dîyî. Ez tim wazena ke Rojakewtena mîyanêne ya Demokratîke de cayê şarê Yahûdîyan zî bibo. Reyna tim hêzê zanist, huner û felsefeya Yahûdîyan rê heyranîye û hurmetê mi estbi. Ganî ê her roje hîna hol fam bikerê ke çîyêkê înan mi kerd bi naye ziraro pîl dayo xo. Kurdî bi vînayîşê raştîye do hîna zaf aye bibê, biresê hêzê xo û bide vînayîşî ke ê eşkenî edelat bica bîyarê.

Do dewam bikero….