Rayberê Şarê Kurdî Abdullah Ocalan, sîstemê Îmraliyî zî sey yew parçeyê Komploya Mîyanneteweyîye vîneno. Kitabê Ocalanî yê bi nameyê ‘PAWITIŞÊ MHMEyî – DEWLETA SUMERE YA RAHÎBAN RA VER BI KOMARA ŞARÎ’ de prosesê komploye û rastîya Îmraliyî her het ra çiman ver fîneno ra. Ma qismê yewendesinî pare kenê:

HEPISXANEYÊ TÎPÊ FYÎ RA HÎNA GIRAN O

Ez muhakemekerdişê Îmraliyî yê bêhiqûqî gêna çimanê xo ver û wazena zanayîş û fikrê xo pêşkêş bika. Ez zî sey Avukatanê xo hemfikir a û vana  madeyanê 2.,3.,5.,6.,7.,8.,9.,10.,13. û 14inî yê PHMEyî ameyê binpaykerdene.

Rastîyê ke cewherê rastîya babete yê û nîyê, ez kena ke înan bika eşkera. Ez yew girawa tek a Tirkîya de, tena yena girewtene û na rewşêka zaf giran a. Şert û mercê ke ez tede ya, şertanê hepisxaneyê Tîpê Fyî ra hîna giran ê. Qet telîmatnameya yew hepisxaneyî de, yew madeyo ke nînan tarîf bikero çin o. Kes nêzano ke ez senî ciwîyena. Hêzê ewlekarîye yê taybetî yê ke humara xo 20 ra zêde yê, şew û roj, 24 saetî bi kamera û çimanê xo mi teqîb kenê. Qaso ke yeno asayene, tena raporê Komîteya Vernîgirewtişê Îşkenceyî yo ke nêzdîyê Mehkemeya Heqanê Merdiman a Ewropa yo eşkeno bikero eşkera ke nê şertî hetê psîkolojîkî ra çiqas giran ê. Wexto ke rewşa hewayî bena xirabe yan zî vurîyena, pêvînayîşê min û Avukatan ê hewteyî betal beno, di hîrê hewteyan de tena yew saete yeno kerdene. Ancax çend û feqîr ê, ancax hande eşkenê bêrê  pêvînayîşê mi. Alerjîyêko giran mi de esto û şertê ney cayî zî xeylî zor danê. Xora hewayê deryayî zî weşîya mi keno tenge. Nê demê peyênî de her deqa ez qirika xo ra awîyê hestî kena pak. Bedenê mi asta xoverdayîşê xo yê peyênî de yo. Wer bi qeydeyê karavana yo. Seba weşîya xo nêeşkena çîyêk bigîra. Nê pêroyîyan ra ver ez tena eşkena Fermandarîya Girawe û îdareyê hepisxaneyî de têkkilîya xo bi hewayê medenî bîyara ca. Problemê mi înan ra nîyê. Statuyo ke yeno bicaardene, enstrumanêko psîkolojîk o tewr pîl o.    

WAŞT KE ŞARÊ KURDÎ BITERSNÊ

Ez ney xusûsan zêde giran nêvînena û wazena sîstemê lîncî yê sîyasîyî biveja meydan. Wextê mehkemeye de pêroyê dinyaye dî ke, hetê tayê hetan ê bi kinc û kîsvetanê sivîlan û çapemenîye ra hewayê lîncî ame viraştene. Salona mehkemeye de, yew rexneya sivike zî rastê lîncî ame. Eke tedbîrê taybetî yê leşkeran ke  nêbîyene, do çîyê xirabî biqewemîyayêne. Çapemenîye teber de bi hewayê terorî waşt ke wa Kurdî bitersê û dewaya xo ra fek biverdê ra.

Waşt ke ma maya xo ra bîyayene ra poşman bikerê.  No wext de bi seyan dost û welatperweran xo vêşna. Bi propagandaya “miheqeq bêro îdamkerdene“ waştêne ke pêroyê hêvîyî bêrê şikitene. Bi taybetî zî waşt ke mi bikerê sey yew merdimê erjanî û çiman ra bidê war o. Bi karîkaturan û tefsîranê ecêban, waşt ke xoverdayoxîya mi bişiknê. Hedefê sîstemî yo esas, hişmendîya welatperwerîya şarî çinêkerdiş bî û waşt ke  şar ney mucadeleyî sey ê xo mevîno. Yew Kilama ke seba mi ameya vatene, yew şiîra ke seba mi ameya wendene, bîyêne sebebê lîncî. Ahmet Kayayî seba mi yew di kilamê haştîye vatî û rastê lîncê sîyasîyî ame. Êdî nêeşkîya Tirkîya de bimano. Sey xayînî ame îlankerdene. Wextê ra tepîya ney janî ver deyax nêkerd û Ewropa de  şehîd kewt.  

XÎRETÊ MA YÊ SEBA WERÊAMEYÎŞÊ DEMOKRATÎKÎ

Netîceyê xîretê ma yê werêameyîşê demokratîk û haştîyaneyî de, no atmosfero şoven, her çiqas ke kêm bo zî mabên ra nêdarîya we. Komelî xîlafê xo yê rastikênî hîna baş dîyî. Dî ke bi şerê taybetî senê bêusûlîyî ameyê kerdene û fehm kerd ke sebebê krîzê giranî sîyaseto rantwer o. Hetê bînî ra meqamanê dewlete yê mesuldaran raporî dayî û nê raporan de  eşkera kerd ke bi polîtîkayanê înkar û îmhakerdişê klasîkî dewlete nêeşkena xo probleman ra bixelesno. Seba naye zî ganî reform û newe ra awankerdişo demokratîk bêro dest pêkerdene. PKKyî zî xo hem hetê îdeolojî, hem hetê pratîkî ra vurna. Pêroyê komelî fehm kerd ke rewşêka neweye vejîyaya meydan. Her hetî xorîn fikirîyenê, fikir û pratîkê muhîmî çi yê înan ra gêrenê û goreyê naye polîtîkayanê xo virazene. Pêroyê komelê Tirkîya zî kewto bi ney hewayî. Her het xo tarîx ra heta ewro newe ra senceno û dinyaye, zere û teberê welatî hîna bi rastîye vîneno û goreyê naye program û perspektîfan virazeno.

ÎDEOLOJÎ Û OLÎGARŞÎYO FERMÎ NÊBÎ SERKEWTE

Problemê Tirkîya yê şer û haştîye, problemê Kurdan ra hîna  xorî yo. Hem problemê tarîxîyî hem zî problemê 30 serra peyêne yê dînî û nîjadîyî na rastîye daya teber. Îdeolojî û îradeyê olîgarşîk ê fermî yê Komare bi zext û zorî kerd ke komelî ser tekrengîye ferz bikero, la nêbî serkewte. Xîlafî û pêkewtişan no kerd parçe. Çîyo ke hewce keno o yo ke ganî bi qanunê bingêhênî, zafrengî û zafvengîye esas bêro girewtene. Komel no derheq de tim aver şono û waştena xo de israr keno. Tirkîyaya serranê 2000î eslê xo de her çiqas bi zehmet bo zî newe ra şekil dana Komara laîk û demokratîke.

TARÎX DE REYA VERÊNE YA KE KURDÎ YEWBÎNÎ RA NÊVISÎYAYÊ

Prosesê Îmraliyî yê mabênê merg û cuye de, hewcedarîya vurîyayîşî xo baş musnayo û hetê bînî ra derheqê çareserîye de ray û raybazî zî kerdê eşkera. Bêguman no derheq de dilsozîya PKK û Şarê Kurdî ya girêdayîye ya bi Rayberîya xo rolêko muhîm kay kerdo. Kurdî tarîx de reya verêne ya ke, vera komploya zere û teberî yewbînan ra nêvisîyayê, nêbîyê vila û eksê ci, yewbînî pê girewtê û seba haştîye û demokrasîye tewirê xo musnayo. Bi hêzê ney vindertişê durûstî, dewlete û komelî ser de zî tesîr dayo viraştene û seba kontratê komelkîyî ya demokratîk û haştîyaneye, gama muhîme daya eştene.

Kontrato Komalkî yo ke Kurdan zî xo mîyan de gêno û pêroyîya dewlete û yewîya dewlete esas gêno hetê şarî ra ameyo qebulkerdene û no derheq de munaqaşayê tewr bâşî yenê kerdene. Nê dejê ke yenê antene, dejê newebîyayîşî yê. Merdim ke nê hetî ra biewno ci ra, prosesê ciwîyayîşê min ê Îmraliyî, derheqê pawitişê meşruyî de, wezîfeyê giranî dano milê min û her kes û her hetî ser. Seba ke no wezîfe demokrasîya tame û haştîya bihurmete bîyaro ca, ganî PKK zî hem hetê kalîte hem zî hetê humare ra xo hîna bikero pêt. No tena vera nêwaştoxanê haştîye yê Tirkîya nê, no seba nêwaştoxanê haştîye yê Rojakewtena Mîyanêne û

MUHÎMÎYA KOMELÊ SIVÎLÎ

Xusûso dîyin o muhîm zî o yo ke ganî Kurdî xo rewşa klasîke ra bikerê dûrî û bibê wayîrê komelêkê sivîlî û her het û her kesî bigîrê xo mîyan. Cewabo ke şar seba cuya min a Îmraliyî bido no yo, yanî komelo sivîl o. Seba Tirkîya zî çîyo tewr muhîm awankerdişê komelê sivîlî yo. Komelo sivîl ke nêro awankerdene, bi fermanê dewleta klasîke qet çîyêk aver nêşono û vurîyayîş û demokrasî nêbeno.

ÇINKERDIŞO KE BI MI DEST PÊKENO

Ez xoverdayîşê xo yê Îmraliyî yê mabênê merg û cuye de, bi na berpirsîyarî û bi na hişmendîye ez bi samîmîyet kena ke ney bîyara ca. Pêro kes û sazîyê eleqedarî ganî baş bizanê ke no seba şarê ma yeno çi mana û no derheq de ganî samîmî tê bigêrê. Haştîya bihurmete û demokrasîya tame, bingehê xebatanê ma yê û ganî no esas bêro girewtene. Ganî hêzê şerwanan û yê çeteyan nêro vîrrakerdene. Çinkerdişo ke bi mi dest pêkeno ganî baş bêro dîyene. Eke bibo serkewte, sere de Kurdî pêroyê şarê Tirkîya do rastê qirkerdişî bêro, ganî no nêro xovîrrakerdene.

Ganî baş bêro zanayene ke, hedefê hêzanê teber û zereyî yê ke komplo amade kerdo no yo û ganî nêro vîrrakerdene ke wext û şertî ke musaît be, ê do dest bi çinkerdişî bikerê. No derheq de ganî senî ke –meşte do komplo bibo- amadekarîyî bêrê kerdene û pawitiş esas bêro girewtene.

Do dewam bikero…